Erevandaǵy saýda ortalyǵynda jarylys boldy

EREVAN. QazAqparat – Armenııa astanasy Erevandaǵy «Sýrmalý» saýda ortalyǵynda jarylys boldy. Tótenshe jaǵdaılar mınıstrliginiń habarlaýynsha, oqıǵa saldarynan zardap shekkender bar, dep habarlaıdy «QazAqparat» HAA menshikti tilshisi.

Túske taman Erevannyń ortalyǵyndaǵy «Sýrmalý» kóterme-bólshek saýda ortalyǵynda jarylys bolyp artynan órt shyqty.

Armenııanyń Tótenshe jaǵdaılar mınıstrligi oqıǵa ornyna 10 órt sóndirý toby ketkenin habarlady.

«Aldyn ala málimetter boıynsha, jarylys bolyp, arty órtke aınaldy. Zardap shekkender bar. Órttiń kúrdeliligi úshinshi deńgeıde»,-delingen Armenııanyń Tótenshe jaǵdaılar mınıstrliginiń habarlamasynda.

Jergilikti BAQ-tyń habarlaýynsha, jarylystyń saldarynan saýda ortalyǵy janyndaǵy ǵımarat qulady. Ol pırotehnıkalyq dúken ǵımaraty bolýy múmkin degen boljam bar.