Erevandaǵy atystyń jaı-japsary belgili boldy (FOTO)
EREVAN. QazAqparat - 27 shildege qaraǵan túni Erevandaǵy polıtsııa ǵımaraty bólimin basyp alǵan «Sasna Tsrer» radıkaldy qarýly top músheleri men quqyq qorǵaý organdary qyzmetkerleri arasynda atys oryn aldy. Nátıjesinde bir polıtsııa qyzmetkeri jáne radıkaldy toptyń birneshe múshesi jáne onyń kóshbasshysy Pavel Manýkıan jaraqat aldy.
Polıtsııanyń qoǵammen baılanys basqarmasynyń basshysy Ashot Agaronıannyń habarlaýynsha, 27 shildege qaraǵan túni qarýly toptyń eki múshesi - Gagık Egıazarıan men Aram Akopıan bılikke óz erikterimen berildi.
Jaralanǵandar «Erebýnı» medıtsınalyq ortalyǵyna jetkizilip, qajetti kómek kórsetildi.
«Túngi saǵat birde «Erebýnı» medıtsınalyq ortalyǵyna úsh jaraly adam tústi. Onyń biri polıtsııa qyzmetkeri. Onyń oq tıgen aıaǵyna dárigerler ota jasady. Qazir jaǵdaıy turaqty. Ózge jaralanýshylar - Pavel Manýkıan jáne onyń uly Aram Manýkıanǵa da ota jasalyp, jansaqtaý bólimine aýystyryldy», - dep habarlady jergilikti BAQ «Erebýnı» MO dırektory Mıkael Manýkıanǵa silteme jasap.
Aıta keteıik, ótken túni oryn alǵan oqıǵa radıkaldy qarýly top músheleri men quqyq qorǵaý organdary qyzmetkerleri arasyndaǵy birinshi atys emes.
26 shildege qaraǵan túni «Sasna Tsrer» top músheleri avtokólikpen polıtsııa kúzet jasaǵyna jaqyndaǵysy kelip, polıtsııa qyzmetkerlerimen atys-shabys ótkizdi. Onda radıkaldy top músheleri - Ashot Petrosıan men Ovannes Arýtıýnıan jaraqat alyp, bılik olardy «Erebýnı» medortalyǵyna jetkizdi.
Polıtsııa málimetinshe, qazirgi ýaqytta olar tutqyndarǵa arnalǵan aýrýhanaǵa aýystyryldy. Olarǵa zańsyz qarýdy saqtaý jáne tasymaldaý, top bolyp ǵımaratty basyp alý boıynsha aıyp taǵyldy.
Eske sala keteıik, 17 shilde kúni «Sasna Tsrer» radıkaldy tobynyń músheleri Erevan qalasy Erebýnı aýdanyndaǵy kúzet polkyna basqynshylyq jasap, birneshe polıtsııa qyzmetkerin kepilge aldy. Keıinirek, kelissózder arqyly kepilge alynǵan barlyq tutqyndy bosatty. Alaıda, polıtsııa bólimi ǵımaratyn ustap otyr. Qoıǵan talaptary sol baıaǵy.
