Erevandaǵy atysta bir polıtseı jaralandy
Erevanda polıtsııa bólimshesin basyp alǵandar men tártip saqshalary arasyndaǵy atysta bir polıtsııa qyzmetkeri jaralandy. Bul týraly Feısbýktegi jeke paraqshasynda Armıan ІІM baspasóz hatshysy Ashot Agarorıan habarlady.
Basyp alynǵan ǵımarat mańynda juma kúni «Sasna tsrer» qozǵalysynyń jaqtastary qarsylyq sherýine shyqqan. Aıta keteıik, bul qozǵalys músheleri eki apta buryn polıtsııa bólimshesinde adamdardy kepilge alǵan, qazirgi ýaqytqa deıin olardyń ózderi sol ǵımarat ishinde bekinip otyr.
Agaronıannyń aıtýynsha, juma kúni bir top adam sherýge shyǵýshylardan bólinip, polıtsııa qorǵanys sabyn buzbaq boldy. Maqsattary basyp alynǵan ǵımartqa ótý bolǵan.
Osy ýaqytta ǵımarattaǵy, polk aýmaǵyndaǵy qarýly top músheleri ár tarapqa oq jaýdyra bastady. Atys saldarynan bir polıtseı jaralandy. Ol aýrýhanaǵa jetkizildi.
Eldiń Densaýlyq saqtaý mınıstrliginiń baspasóz hatshysy jalpy 5 polıtseıdiń zardap shekkenin aıtyp otyr. Onyń bireýine oq tıip, jaralanǵan.
Aıta keteıik, Erevanda juma kúni polıtsııa sherýge qatysýshylar aktsııasyna tosqaýyl qoıdy. Olardy taratý úshin tútindi shashkalar men shýly granatalar paıdalandy. Sherýge shyǵýshylar polıtsııaǵa tas atyp, qarsylyq tanytty. Olardyń qatary - 3 myń adam.
Jalpy, osy qaqtyǵystan barlyǵy 30 adam zardap shekti.
Eske sala keteıik, «Sasna tsrer» qozǵalysynyń adamdary 17 shilde kúni polıtsııa bólimshesin basyp alyp, ondaǵy qyzmetkerlerdi kepilge alǵan. Biraq birneshe kúnnen keıin adamdardy bosatyp, ózderi ishinde bekinip qaldy.
Qarsylyq aktsııasyna qatysýshylar el prezıdentiniń otstavkasy men oppozıtsııa jetekshisi Jıraır Sefılıandy bosatýdy surady.
