Erevandaǵy «Zvartnots» áýejaıynda 500 mln dollarǵa jańa termınal salý josparlanyp otyr
ASTANA. KAZINFORM — Armenııa halyqaralyq áýejaılarynyń bas dırektory Marselo Vende Forbes jýrnalyna bergen suhbatynda Erevandaǵy «Zvartnots» áýejaıynyń jańa termınalynyń qurylysyna 500 mıllıon dollar ınvestıtsııalaýdy josparlap otyrǵanyn málimdedi, dep habarlaıdy agenttiktiń menshikti tilshisi.
Kásipkerdiń aıtýynsha, sońǵy eki jylda áýejaıdaǵy jolaýshylar aǵyny mejeden asyp, kelýshiler sany 5,5 mıllıonnyń ústine shyqty. Alaıda qazirgi termınal 3-4 mıllıon jolaýshyny qabyldaýǵa arnalǵan. Sondyqtan áýejaıdy keńeıtý mańyzdy máselege aınalyp otyr.
— 2001 jyly Armenııaǵa kelgenimizde áýejaıdyń ınfraqurylymy eskirip, qulaý aldynda turǵan edi. Biz ony birte-birte qalpyna keltirip, 10 jyldan astam ýaqyt boıy elge qyzmet kórsetken zamanaýı termınaldy jasadyq. Endi damý tendentsııalaryna saı bolý úshin biz aldaǵy 10 jylda áýejaıdyń ótkizý qyzmetin eki esege ulǵaıtyp, 500 mıllıon dollar ınvestıtsııalaýdy josparlap otyrmyz. Qaqpalardyń sany altydan 16-ǵa deıin, al kelý zaldary, ımmıgratsııa jáne keden aımaqtarynyń sany eki esege artady. Zamanaýı zaldar salyp, avtoturaqtardy keńeıtip, jolaýshylardy tasymaldaýdy jaqsartamyz. Sondaı-aq avtomattandyrylǵan tsıfrlyq tólqujat qaqpalary men jańa bıometrııalyq tólqujat júıesin engizýdi josparlap otyrmyz. Bul Armenııa azamattarynyń shetelderge, ásirese Eýropaǵa barýyn jeńildetedi. Bizdiń maqsatymyz — Armenııanyń aımaqtaǵy básekege qabiletti tranzıttik hab mártebesin alý, — dedi Vende.
Erevandaǵy «Zvartnots» halyqaralyq áýejaıyn Armenııa úkimetimen 2001 jyly jasalǵan 30 jyldyq kontsessııalyq kelisim boıynsha «Armenia International Airports» JAQ basqarady.
«Armenia International Airports» JAQ ıesi — American International Airports argentınalyq kompanııasy. Ol armıan tegindegi Argentına azamaty Edýardo Eýrnekıanǵa tıesili.
Aıta keteıik, buǵan deıin Shymkent áýejaıy Eýropanyń derekter bazasyna engizilgenin jazdyq.