Erevanda oppozıtsııa mıtıngisi ótip jatyr

EREVAN. QazAqparat – Erevanda Premer-mınıstr Nıkol Pashınıannyń qyzmetinen ketip, ýaqytsha úkimettiń qurylýyn talap etkender mıtıngige shyqty. Oppozıtsııa ókilderi RF Prezıdenti Vladımır Pýtın, Ázerbaıjan Prezıdenti Ilham Alıev jáne Armenııa Premer-mınıstri Nıkol Pashınıan Taýly Qarabaq mańyndaǵy soǵysty toqtatý týraly ortaq mámilege qol qoıǵannan keıin qarsylyq sharasyna shyǵyp jatyr. Bul týraly QazAqparattyń menshikti tilshisi habarlaıdy.

Erevan ortalyǵyndaǵy Bostandyq (Svoboda) alańynda Taýly Qarabaqtaǵy qaqtyǵysty toqtatý týraly RF, Ázerbaıjan men Armenııa kóshbasshylarynyń ortaq málimdemesine oppozıtsııa ókilderi qarsylyq tanytyp jatyr. 17 partııadan quralǵan oppozıtsııa mıtıngi kezinde tyǵyryqtan qalaı shyǵýǵa bolatyny týraly óz josparyn usyndy: «Ulttyq qutqarý komıtetin» qurý, Nıkol Pashınıandi qyzmetinen bostaý jáne qazirgi úkimetti taratyp, ýaqytsha úkimet qurý. Sondaı-aq, mıtıngi uıymdastyrýshylary men qatysýshylary kezekten tys Parlament otyrysyn shaqyrýdy talap etip jatyr.

«Armenpress» basylymynyń habarlaýynsha, mıtıngiden keıin qatysýshylar Bostandyq alańynan Armenııa Úkimeti ǵımaratyna baryp, sodan keıin Parlament ǵımaratyna ketti.

Armenııa polıtseıleri eldegi soǵys jaǵdaıyna baılanysty jappaı aktsııalar uıymdastyrýǵa tyıym salynǵanyn eskertti.

«Armenpress» málimeti boıynsha, Nur-Sultan ýaqytymen 15.30-da polıtsııa 79 adamdy alyp ketti.

Eske sala ketsek, 9 qarashada Ázerbaıjan Respýblıkasynyń prezıdenti Ilham Alıev, Armenııa Respýblıkasynyń premer-mınıstri Nıkol Pashınıan jáne Reseı Federatsııasynyń prezıdenti Vladımır Pýtın 2020 jyldyń 10 qarashasynan, Máskeý ýaqytymen 00 saǵat 00 mınýttan bastap Taýly Qarabaq mańyndaǵy soǵys jaǵdaıyn tolyq toqtatý týraly málimdemege qol qoıdy.