Erevanda qazaqtyń ulttyq dámi usynyldy
ASTANA. KAZINFORM — Qazaqstannyń Armenııadaǵy elshiligi Halyqaralyq Armenııa áıelderi qaýymdastyǵy (IWAY) uıymdastyrǵan Erevandaǵy jyl saıynǵy dástúrli Rojdestvolyq qaıyrymdylyq jármeńkesine qatysty. Bul týraly Kazinform agenttiginiń menshikti tilshisi habarlady.
Іs-shara dástúrli túrde dıplomatııalyq mıssııalardy, halyqaralyq uıymdardy jáne jergilikti qaıyrymdylyq bastamalardy biriktiredi. Jármeńkeniń basty maqsaty – Armenııada júzege asyrylyp jatqan áleýmettik jáne gýmanıtarlyq jobalardy qoldaýǵa qarajat jınaý.
Qazaqstandyq stendte ulttyq bolmysty aıshyqtaıtyn estelik buıymdar toptamasy, sondaı-aq mádenıet pen turmysqa qatysty zattar usynyldy. Qonaqtar etnıkalyq sándik buıymdar men qolóner týyndylaryna erekshe qyzyǵýshylyq tanytty.
Kórme qonaqtaryna qazaq dastarhany erekshe unady. Dıpmıssııa qyzmetkerleriniń jubaılary ázirlegen manty, palaý, baýyrsaq, samsa jáne dástúrli táttiler jármeńkedegi eń suranysqa ıe taǵamdardyń qataryna kirdi. Sondaı-aq qazy-qarta da joǵary baǵalanyp, kóptegen qonaq ony Qazaqstannyń ulttyq dámimen tanysý nıetimen satyp aldy.
Dıplomatııalyq ókildik ókilderiniń aıtýynsha, qazaqstandyq taraptyń qatysýy Qazaqstan men Armenııa arasyndaǵy mádenı baılanysty nyǵaıtýǵa jáne gýmanıtarlyq yntymaqtastyqty damytýǵa yqpal etedi.
— Qazaqstannyń Armenııadaǵy elshiligi bul qaıyrymdylyq jármeńkege jyl saıyn qatysady. Qatysýshylarymyz dástúrli ulttyq taǵamdardy daıyndap, estelik buıymdar usynyp, qonaqtardy elimizdiń mádenıeti men salt-dástúrimen tanystyrady. Biz árdaıym jergilikti turǵyndardyń Qazaqstanǵa jáne onyń ashanasyna degen zor qyzyǵýshylyǵyn sezinemiz. Bul ıgi dástúr mádenıetterdi jaqyndastyryp, dostyq atmosferasyn qalyptastyrady ári elimizdi beıresmı jaǵdaıda jańa qyrynan tanytýǵa múmkindik beredi, — dep áserimen bólisti jármeńkege qatysýshy Lázzat Erkinova.
Aıta keteıik, osyǵan uqsas dástúrli qaıyrymdylyq jármeńke Qazaqstan Respýblıkasynda akkredıttelgen dıplomatııalyq ókildikterdiń qatysýymen Tájikstannyń Ulttyq mýzeıinde de ótken bolatyn.