Erevanda Qazaqstannyń týrıstik áleýeti tanystyryldy
ASTANA. KAZINFORM — Erevanda qazaq-armıan týrıstik yntymaqtastyǵyn damytý máselelerine arnalǵan dóńgelek ústel aıasynda Qazaqstannyń týrıstik áleýeti tanystyryldy. Іs-sharany Qazaqstannyń Armenııadaǵy Elshiligi Armenııa Týrızm federatsııasynyń qoldaýymen uıymdastyrdy, dep habarlaıdy Kazinform menshikti tilshisi.
Dóńgelek ústel Qazaqstannyń týrıstik múmkindikterin ilgeriletýge, armıan qoǵamynyń eldiń týrıstik áleýeti jónindegi habardarlyǵyn arttyrýǵa, sondaı-aq eki memleket arasyndaǵy týrıstik almasýdy keńeıtip, mádenı-gýmanıtarlyq baılanystardy nyǵaıtýǵa arnaldy.
Іs-shara barysynda qatysýshylar týrızm salasyndaǵy ekijaqty yntymaqtastyqty kúsheıtý jóninde tájirıbe almasyp, usynystaryn ortaǵa saldy. Dóńgelek ústel jumysyna Qazaqstannyń Armenııadaǵy Tótenshe jáne Ókiletti Elshisi Bolat Imanbaev, Armenııa Týrızm komıtetiniń tóraǵasy Lýsıne Gevorkıan, Armenııa Respýblıkasynyń Týrızm federatsııasynyń prezıdenti Mehak Apresıan qatysty.
Onlaın formatta QR Týrızm jáne sport mınıstrligi Týrızm ındýstrııasy komıtetiniń tóraǵasy Nurtas Qarıpbaev, «Kazakh Tourism» UK» AQ Marketıng jáne halyqaralyq naryqtar departamentiniń dırektory Aınur Jumataeva, sondaı-aq Armenııanyń týrıstik bıznes ókilderi sóz sóıledi.
Іs-sharada sóılegen sózinde Bolat Imanbaev Qazaqstan búginde týrısterge mádenı-tanymdyq jáne ekologııalyq týrızmnen bastap iskerlik, sporttyq jáne medıtsınalyq týrızmge deıingi keń aýqymdy baǵyttardy usynatynyn atap ótti. Onyń aıtýynsha, sońǵy jyldary elde týrıstik ınfraqurylym belsendi damyp, jańa týrıstik klasterler qalyptasyp, qyzmet kórsetý sapasy artyp keledi.
— Statıstıka eki el azamattarynyń týrıstik saparlarǵa degen ózara turaqty qyzyǵýshylyǵy bar ekenin kórsetip otyr, — dedi dıplomat.
Elshi ekijaqty yntymaqtastyqtyń áleýetin anaǵurlym keń kólemde iske asyrý úshin qolaıly kólik-logıstıkalyq sheshimder qajet ekenin atap ótti. Osyǵan baılanysty Qazaqstan Respýblıkasynyń Armenııadaǵy Elshiligi eki eldiń tıisti vedomstvolarymen birlesip Erevan – Astana – Erevan baǵyty boıynsha tikeleı turaqty áýe qatynasyn qaıta jandandyrý máselesin pysyqtap jatqanyn habarlady.
Sonymen qatar taraptar týrıstik saladaǵy yntymaqtastyqty, onyń ishinde týroperatorlar men buqaralyq aqparat quraldary ókilderine arnalǵan tanystyrý saparlaryn uıymdastyrý arqyly odan ári damytýǵa ýaǵdalasty. Bul týrıstik múmkindikterdi ornynda kórip, eki eldiń áleýetin barynsha obektıvti ári tartymdy túrde tanystyrýǵa múmkindik beredi.
Kezdesý qorytyndysynda qatysýshylar týrıstik dıalogty damytý qazaq-armıan seriktestigin nyǵaıtýǵa jáne gýmanıtarlyq baılanystardy keńeıtýge qosymsha serpin beretinine senim bildirdi.
Aıta keteıik, buǵan deıin Erevanda qazaqtyń ulttyq dámi usynyldy.