Erevanda Qazaqstannyń tsıfrlyq bolashaǵy jáne Armenııamen yntymaqtastyq áleýeti talqylandy
EREVAN. KAZINFORM – Erevanda Qazaqstan Prezıdenti Q.Toqaevtyń halyqqa arnaǵan Joldaýynda «Jasandy ıntellekt dáýirindegi Qazaqstan: ózekti mindetter jáne olardy tsıfrlyq transformatsııa arqyly sheshý» taqyrybynda dóńgelek ústel ótti. Bul týraly Syrtqy ister mınıstrligi málim etti.
Іs-shara barysynda qatysýshylar Joldaýdyń negizgi baǵyttarymen tanysty. Óz sózinde Elshi B.Imanbaev Qazaqstannyń damýyndaǵy qazirgi úrdister, júrgizilip jatqan aýqymdy reformalar jáne eldiń syrtqy saıasatyndaǵy basymdyqtaryna toqtaldy.
Armıan sarapshylary Joldaýda kórsetilgen bastamalardyń Qazaqstannyń ishki jańǵyrýy úshin de, búkil aımaq úshin de mańyzdy ekenin atap ótti. Tsıfrlandyrý, kólik ınfraqurylymyn jáne energetıkany damytý máselelerinde Armenııamen kún tártibiniń uqsastyǵy erekshe atalyp ótti. Armenııa Premer-mınıstri apparaty janyndaǵy Qoǵamdyq baılanystar jáne aqparat ortalyǵynyń halyqaralyq qatynastardy zertteý departamentiniń basshysy Dj.Melıkıannyń pikirinshe, tsıfrlyq memleket qurý baǵyty Armenııamen yntymaqtastyqty tereńdetýdiń jańa kókjıekterin ashyp, ásirese jasandy ıntellekt pen smart-qalalar salasynda zor múmkindikter beredi.
Halyqaralyq áleýetke ıe bolashaq tehnologııalyq klaster retinde usynylǵan «Alatau city» jobasy erekshe qyzyǵýshylyq týdyrdy. «Integratsııa jáne damý» birlestiginiń tóraǵasy A.Safarıan bul jobany tehnologııalyq serpilistiń sımvoly – halyqaralyq yntymaqtastyq úshin perspektıvti alań retinde sıpattap, osy múmkindikti der kezinde paıdalaný qajettigin atap ótti.
Armenııanyń turaqtylyq jáne memlekettik basqarý ınstıtýty negizin qalaýshy, saıasattaný ǵylymdarynyń kandıdaty G.Melıkıan: «Tsıfrlandyrý – zamanaýı damýdyń ajyramas bóligi. Qazaqstan jańa tehnologııalyq shyndyqqa jedel beıimdelip, bul baǵyttaǵy jetistikterimen tánti etýde» – dedi.
Talqylaý barysynda sarapshylar Joldaýdyń syrtqy saıası qyrlaryna da nazar aýdardy. Qazaqstannyń eýrazııalyq ıntegratsııany damytýdaǵy jáne jańa kólik-logıstıkalyq dálizderdi qalyptastyrýdaǵy belsendi róli atap ótildi. Qazaqstan men Armenııanyń geografııalyq ornalasýyn eskere otyryp, Ortalyq Azııa men Ońtústik Kavkazdy baılanystyratyn kólik kommýnıkatsııalaryn damytýda kúsh biriktirýge qyzyǵýshylyq bildirildi.
Qazaqstannyń bir palataly parlamenttik júıege kóshý bastamasy da qyzyǵýshylyq týǵyzdy. Kavkaz ınstıtýtynyń dırektory A.Iskandarıan: «2019 jyldan beri Prezıdenttiń árbir joldaýy – eldiń uzaq merzimdi damý strategııasynyń qısyndy kezeńi. Búginde biz tehnologııalyq transformatsııanyń saıası jańǵyrýmen qatar júrýin baıqaımyz, bul qurmetke laıyq» – dep atap ótti.
Áleýmettik-ekonomıkalyq damý ortalyǵynyń basshysy G.Makarıannyń pikirinshe, ambıtsııalyq mindetterdiń tabysty júzege asýy úshin kásibı baza qajet, bul turǵyda kadr daıarlaý jáne tájirıbe almasý basym baǵytqa aınalýy tıis.
Sarapshylar Qazaqstan – Armenııa yntymaqtastyǵynyń qazirgi úrdisterin talqylaı kele, bıylǵy jyldyń ekijaqty qatynastar úshin mazmunǵa asa baı ekenin atap ótti. Olardyń baǵalaýynsha, saıası, ekonomıkalyq jáne gýmanıtarlyq baǵyttarda dıalog belsendi damýda.
Dóńgelek ústel qorytyndysy boıynsha qatysýshylar osyndaı kezdesýlerdi jalǵastyrýdyń mańyzdylyǵyn atap ótip, olardy ózara pikir almasý men yntymaqtastyqty keńeıtýge arnalǵan tıimdi alań dep baǵalady.
Aıta keteıik, jaqynda Qazaqstanda Jasandy ıntellekt jáne tsıfrlyq damý mınıstrligi quryldy.