Erevanda Qazaqstannyń IT salasyn damytýdaǵy tájirıbesi tanystyryldy
EREVAN. KAZINFORM – Bul kúnderi Armenııa astanasynda ornalasqan Meridian kórme ortalyǵynda Digitec-2026 konferentsııasy men kórmesi ótip jatyr, dep habarlaıdy Kazinform agenttiginiń Erevandaǵy menshikti tilshisi.
Aýqymdy is-sharaǵa shet memleketterden kelgen 30 myńnan astam adam, 220-ǵa jýyq kompanııa qatysyp jatyr. Sala sarapshylary jasandy ıntellektini damytý men ony túrli sektorlarǵa tıimdi engizý taqyryptarynda pikir almasyp, birlesken jobalardy iske asyrý múmkindikterin talqylaýda.
Meridian ortalyǵyndaǵy kórmede Qazaqstannyń iri tehnologııalyq jobalary tanystyrylǵan stend ornalasqan. Elimizdegi IT salasynyń damýyna qazyǵýshylyq tanytqandardyń qatary qalyń. Qazaqstanda startap jobalardy iske asyrýǵa nıetti kompanııa jetekshileri men ókilderi Astana Hub ınnovatsııalyq klasteri tarapynan kórsetiletin qoldaý sharalaryn zerdelep jatyr.
- Biz Astana Hub tehnoparkin tanystyryp jatyrmyz. Atap aıtqanda, elimizge kelýge nıetti IT-kompanııalar men mamandardy aqparattandyrýǵa basymdyq berilgen. Máselen, olarǵa Digital Nomad jáne Digital Nomad Residence sııaqty vızalardy rásimdeýge kómektesemiz. Kórme aıasynda armenııalyq mamandar Astana Hub-tyń qyzmetine qyzyǵýshylyq bildirýde. Tıisinshe, olarǵa Qazaqstanda IT-kompanııalardy tirkeý erejelerin, usynylatyn jeńildikter men múmkindikterdi egjeı-tegjeı túsindirip jatyrmyz, - dedi Astana Hub ınnovatsııalyq klasteriniń Halyqaralyq seriktestermen jumys jónindegi bas menedjeri Sát Dúısekov.
Kórme aıasynda «Ulttyq aqparattyq tehnologııalar» aktsıonerlik qoǵamynyń mamandary da kelýshilerge elimizde júzege asyp jatqan ilkimdi jobalardy tanystyryp, jańa tehnologııalardy engizý qarqynyn baıandady. Tyń aqparat alǵan sheteldikter Qazaqstandaǵy IT salasynyń damýyn joǵary baǵalap, bul naryqty tereń zerdeleýge múddeli ekenin bildirdi.
Qosa ketsek, taıaýda Kazinform agenttigine suhbat bergen Armenııa qoldanbaly saıası zertteýler ınstıtýtynyń (APRI Armenia) ǵylymı qyzmetkeri Sergeı Melkonıan Qazaqstan tehnologııalyq damý arqyly memlekettik basqarý júıesiniń tıimdiligin arttyryp jatqanyn aıtty.