Erevanda Qazaqstandaǵy Prezıdent saılaýy talqylandy
Erevanda Qazaqstannyń Armenııadaǵy elshisi Tımýr Orazaevtyń qatysýymen Qazaqstanda ótetin Prezıdent saılaýyna baılanysty BAQ ókilderine arnalǵan brıfıng ótti. Onyń barysynda jergilikti BAQ tilshileri, sarapshylar, Armenııadaǵy Qazaqstan elshiliginiń ókilderi Qazaqstanda bolyp jatqan ishki saıası jaǵdaılardy, aldaǵy prezıdenttik saılaýdy jáne oǵan daıyndyq barysyn talqylady. Budan ózge, shara qatysýshylary Qazaqstan men Armenııa arasyndaǵy qazirgi kezdegi ekijaqty qarym-qatynasty jáne onyń aldaǵy damý máselelerin sóz etti.
«Joǵary bılikti ótkizý beıbit jaǵdaıda ári Konstıtýtsııaǵa saı ótkizildi. Іs basyndaǵy Prezıdent Qasym-Jomart Toqaev qoǵamdyq-saıası kelisimdi qamtamasyz etý, ekiushtylyqty boldyrmaý, ishki jáne syrtqy saıasattyń sabaqtastyǵy men boljamdylyǵyn qýattaý úshin merziminen buryn saılaý ótkizý týraly jarııalady. Bul strategııalyq mindetterdi odan ári sheshý jáne memlekettiń áleýmettik-ekonomıkalyq damýy úshin mańyzdy», - dedi T.Orazaev.
Brıfıng qatysýshylarynyń suraqtaryna jaýap bergen T. Orazaev prezıdenttik saılaýǵa qatysý úshin partııalar men qoǵamdyq birlestikter usynǵan kandıdattar týraly tolyǵyraq aqparat berdi. Sondaı-aq buǵan deıingi prezıdenttik naýqandardan aıyrmashylyǵyn jáne ereksheligin atap ótti.
Elshi Armenııada ýaqytsha jáne turaqty negizde turatyn Qazaqstan azamattaryn, sondaı-aq saılaý kúni atalmysh elde bolatyn azamattardy Erevandaǵy Qazaqstan elshiligi uıymdastyrǵan №275 saılaý ýchaskesinde (Demırchıan kóshesi, 1-tuıyq kóshe, 11-úı) daýys berýge bolatynyn habardar etti. Saılaý ýchaskesi 2019 jyldyń 9 maýsymynda jergilikti ýaqyt boıynsha saǵat 7:00-den 20:00-ge deıin jumys isteıdi. Daýys beretin azamattardyń ózimen birge jeke kýáligi bolýy shart.
