Erevanda «Qazaqstan-Armenııa: búgini men bolashaǵy» atty dóńgelek ústel otyrysy ótti
EREVAN. KAZINFORM — Erevanda ótken dóńgelek ústelge qatysýshylar Qazaqstan men Armenııa arasyndaǵy qarym-qatynastardyń qazirgi jaı-kúıi týraly óz baǵalaryn, sondaı-aq ekijaqty qarym-qatynastardy damytý perspektıvalary týraly pikirlerimen bólisti, dep habarlaıdy Kazinform agenttiginiń menshikti tilshisi.
Shara Qazaqstan men Armenııa arasyndaǵy dostyq pen yntymaqtastyq týraly sharttyń 25 jyldyǵyna arnaldy.
Erevanda ótken «Qazaqstan-Armenııa: búgini men bolashaǵy» atty dóńgelek ústelge Armenııa SІM, Armenııa Ulttyq jınalysynyń (Parlament), sarapshylar toptary, saraptamalyq ortalyqtar, halyqaralyq uıymdar, tıisti departamentter men jergilikti BAQ ókilderi qatysty.
Qazaqstannyń Armenııadaǵy Elshisi Bolat Imanbaev sharaǵa qatysýshylarǵa arnalǵan quttyqtaý sózinde Qazaqstanda júrgizilip jatqan reformalar týraly baıandap, ekijaqty qarym-qatynastardyń qazirgi jaǵdaıyna baǵa berip, olardy damytý perspektıvalaryna toqtaldy.
«Armenııa-Qazaqstan» parlamenttik dostyq tobynyń jetekshisi Vagarshak Arýtıýnıan Armenııa men Qazaqstan arasyndaǵy ekijaqty qarym-qatynastardyń deńgeıine baǵa berip, Qazaqstannyń ultaralyq kelisim saıasatynyń qaǵıdattaryn atap ótti.
«Armenııa men Qazaqstan arasyndaǵy qarym-qatynas deńgeıi áldeqaıda joǵary jáne áldeqaıda tıimdi boldy. Barlyq deńgeıdegi kezdesýler bar: saýda ókilderinen bastap, elderdiń prezıdentterine deıin. Meniń oıymsha, biz durys baǵytta kele jatyrmyz. Biz qarym-qatynasymyzdy joǵary baǵalaımyz. Qazaqstan — kópultty memleket, biraq armıandar sol jerde ózderin óte jaqsy sezinedi. Sol úshin Qazaqstanǵa rahmet», — dedi Vagarshak Akopıan.
Armenııa Respýblıkasy SІM Eýrazııalyq aımaq departamentiniń basshysy Jıraır Ananıan dóńgelek ústel taqyrybynyń sımvoldyq mánin atap ótip, elder halyqtary arasyndaǵy dostyqty shynaıy dep atady.
«Qazirgi ýaqytta biz Astana men Erevan arasyndaǵy memleketaralyq qarym-qatynastar ózara qyzyǵýshylyq týdyratyn barlyq sala boıynsha serpindi damyp kele jatqanyn kórip otyrmyz. Bizdiń qarym-qatynastarymyzdyń bul joǵary oń serpini Qazaqstan men Armenııa halyqtaryn ǵasyrlar boıy jalǵasyp kele jatqan shynaıy, naǵyz dostyqtyń berik baılanystaryn tanytyp otyr. Bul mura odan ári damyp keledi. Oǵan joǵary deńgeıdegi saparlar dálel. Armenııa men Qazaqstan ózara senim rýhyndaǵy strategııalyq yntymaqtastyq baǵyttylyǵy negizinde eki el azamattarynyń qazirgi jáne bolashaq urpaqtarynyń birlesken órkendeýi men berik dostyǵy múddesinde Dostyq pen yntymaqtastyq týraly sharttyń qaǵıdattary men erejelerin iske asyrýǵa bel baılaǵanyn atap ótkim keledi», — dep atap ótti J.Ananıan.
Shara barysynda ekijaqty yntymaqtastyqty odan ári damytý boıynsha usynystar ázirleý maqsatynda qyzý pikir almasý boldy. Sarapshylar ekijaqty qarym-qatynastardy damytýdyń ortaq negizderin atap ótti. Sondaı-aq, osy turǵyda birqatar bastamalardy ortaǵa saldy. «Orta derjava» mártebesin rastaý retinde Qazaqstannyń KazAID ınstıtýty aıasyndaǵy beıbitshilik bastamalary men gýmanıtarlyq qyzmeti atap ótildi. Jergilikti mamandandyrylǵan jáne halyqaralyq uıymdardyń ókilderi saýda qarym-qatynastaryn, iskerlik baılanystardy damytý aıasyndaǵy belsendi ekijaqty baılanystar týraly baıandap, perspektıvaly ekijaqty gýmanıtarlyq bastamalar týraly pikirlerimen bólisti.
Qazaqstan Respýblıkasy men Armenııa Respýblıkasy arasyndaǵy Dostyq pen yntymaqtastyq týraly shartqa 1999 jylǵy 2 qyrkúıekte Astanada Armenııa Prezıdenti Robert Kocharıannyń Qazaqstan Respýblıkasyna resmı sapary barysynda qol qoıyldy. Kelisim 2001 jyldyń 23 mamyrynda kúshine endi.
Bıyl Qazaqstan men Armenııa Dostyq pen yntymaqtastyq týraly sharttyń 25 jyldyǵyn atap ótti.
Eske salsaq, budan buryn Armenııa Ázerbaıjanmen shekarany delımıtatsııalaý jónindegi komıssııalardyń birlesken qyzmeti týraly erejeni ratıfıkatsııalaǵany belgili boldy.