Erevanda qarýly top birneshe polıtseıdi kepilde ustap otyr (VIDEO)
EREVAN. QazAqparat - Armenııa polıtsııasynyń aqparaty boıynsha, 17 shilde tańerteń, bir top adam Erevannyń Erýbenı aýdanynyń polıtsııa bólimshesin basyp alǵan. Túrli málimetter boıynsha, olar 6-8 adamdy kepilge alǵan.
Armenııa prezıdenti Serj Sargsıan rejımin kúshtep taıdyrýǵa úndeıtin «Quryltaıshy parlament» jáne «Jańa Armenııa» radıkaldy qozǵalysy jaqtaýshylarynan quralǵan qarýly 25 adam polıtsııa bólimshesiniń qaqpasyn buzyp kirgen.
Quqyq qorǵaýshylardyń aqparatyna sáıkes, olardyń qolynda 6-8 adam bar.
Armenııanyń ulttyq qaýipsizdik qyzmetiniń taratqan habarlamalary boıynsha, radıkaldy top Erevannyń úkimettik jáne ákimshilik ǵımarattaryn basyp alǵandary týraly aqparatty áleýmettik jeliler arqyly taratýda. Alaıda, Armenııanyń UQQ habarlaýynsha, bul aqparat shyndyqqa janaspaıdy, barlyq úkimettik mekemeler qalypty rejımde jumystaryn jalǵastyrýda.
Oqıǵa ornyna arnaıy jasaq kelip jetti, sondaı-aq arnaıy tehnıka da jetkizilgen.
Aldyn ala málimetter boıynsha, qarýly toptyń basty talaptarynyń biri - 2016 jyly 23 maýsymda Erevan telemunarasyna qarýly shabýyl jasamaq boldy degen aıyppen 2 aıǵa qamalǵan «Quryltaıshy parlament» jáne «Jańa Armenııa» radıkaldy qozǵalysynyń kóshbasshysy Jıraıra Sefılıandy bosatý.
Jıraıra Sefılıan «bir top tulǵalarmen birge, aldyn ala kelisim boıynsha birneshe qarý-jaraq pen oq-dári, jarylǵysh zattar nemese jarylǵysh qurylǵylardy zańsyz satyp alý, satý, saqtaý, tasymaldaý nemese alyp júrý» baby boıynsha aıyptalýda.
Oqıǵa ornyn polıtsııa qorshaýǵa aldy, ol jerde birneshe jedel medıtsınalyq járdem kóligi kezekshilikte.
Aldyn ala maǵlumattarǵa sáıkes, atys barysynda qarýly toptyń bir múshesi jaralandy.
