Erevanda «Abaı oqýlary» ótti
EREVAN. QazAqparat - Qazaqstan elshiliginiń bastamasymen Armenııada «Erevandaǵy Abaı oqýlary» atty ádebı-sazdy kesh bolyp ótti, dep habarlaıdy «QazAqparat» HAA menshikti tilshisi.
«Erevandaǵy Abaı oqýlary» ádebı-sazdy keshi L.Gýmılev atyndaǵy Eýrazııa Ulttyq ýnıversıtetiniń rektory Erlan Sydyqov bastaǵan delegatsııanyń Erevanǵa jasaǵan mádenı saparyna qaraı uıymdastyryldy. Keshke Sırek jazbalar men kitaptar ulttyq ortalyǵynyń dırektory Asylhan Sádýov qatysty. Qazaqtyń uly aqynynyń shyǵarmashylyǵy arqaý bolǵan kesh armıan astanasynyń ádebı jáne shyǵarmashylyq top ókilderiniń qyzyǵýshylyǵyn týdyrǵany anyq. Keshke belgili armıan aqyndary men jazýshylary, mádenıet qaıratkerleri men stýdent jastar qatysty.
«Jahandaný zamanynda Qazaqstan men Armenııa jastarynyń Abaı shyǵarmashylyǵyna qyzyǵýshylyq tanytyp otyrǵany qýantady. Qazaqtyń uly aqyny Abaı óziniń óleńderinde bilimdi jastardy aıta kele jetistikter men jeńisterge jetýdiń jalǵyz joly - bilim ekenin jazyp ketken oıshyl», - dedi EUÝ rektory shara barysynda.
Óz kezeginde Qazaqstannyń Armenııadaǵy elshisi Tımýr Orazaev osy keshtiń uıymdastyrylýy - qazaqtyń uly oıshyly, fılosof, kompozıtor, qara sózdiń qas sheberi Abaı Qunanbaıulynyń rýhyna kórsetilgen qurmet ekenin atap ótti.
«Uly Abaı uly shyǵarmalarymen birneshe býyndy tamsandyrǵan tulǵa. Onyń ataǵy qazaq halqynyń aıasynan shyǵyp ketip, álemdi sharlap ketken. Abaı arqyly qazir álem qazaqty, Qazaqstandy tanıdy», - dedi Tımýr Orazaev.
Ádebı-sazdy keshte meımandardyń aldynda «Káýsar» mádenı-tanymdyq birlestiginiń jetekshisi, professor, Qazaqstan Respýblıkasynyń Eńbek sińirgen ártisi Kenjeǵalı Myrjyqbaı óner kórsetti. Maestro kontsertmeıster, halyqaralyq baıqaýlardyń jeńimpazy, pıanınoshy Lıýbov Glınkanyń súıemeldeýimen «Kózimniń qarasy», «Men kórdim uzyn qaıyn qulaǵanyn», «Qarańǵy túnde taý qalǵyp» ánderin áýelete oryndady. Sonymen qatar, Kenjeǵalı Myrjyqbaıdyń armıan kompozıtory Arno Babadjanıannyń «Nıýktorn» týyndysyn oryndap berýi armıandarǵa erekshe syı boldy.
Kesh qonaqtary aldynda sonymen qatar kúıshi, kompozıtor, «Shabyt» halyqaralyq festıvaliniń laýreaty, Qurmanǵazy atyndaǵy halyqaralyq baıqaýdyń jeńimpazy Aıbek Bekbosyn «Adaı», «Elbasy-tolǵaýy», «Torjorǵa», «Baıjuma» kúılerin oryndap berdi.
Ádebı-sazdy kesh barysynda meımandar qazaqtyń uly oıshylynyń shyǵarmashylyǵymen tanysyp, qos halyqtyń mádenı dástúrleriniń bastaýy týraly oı bólisti. Ózderiniń jyly lebizderinde armıan halqynyń mádenı qaıratkerleri Abaı óleńderiniń tereńdigin sezingenderin bildirip, kesh uıymdastyrýshylaryna alǵysyn aıtty.
