Erevan ShYU músheligine qyzyǵýshylyq tanytty

ASTANA. KAZINFORM –  Erevan Shanhaı yntymaqtastyq uıymyna múshe bolýǵa qyzyǵýshylyq bildirdi. Bul týraly eldiń Syrtqy ister mınıstrligi habarlady, dep jazady Kazinform agenttiginiń menshikti tilshisi. 

– Shanhaı yntymaqtastyq uıymynyń negizgi qaǵıdattaryn – aýmaqtyq tutastyqty, kúsh qoldanbaýdy jáne shekaralardyń myzǵymastyǵyn bólise otyryp, Armenııa Respýblıkasy ShYU-ǵa múshe bolýǵa nıet bildirdi, – delingen taratylǵan habarlamada.

Buǵan deıin Armenııanyń Eýropalyq odaqqa múshe bolý jóninde kelissózder júrgizip jatpaǵany jáne Brıýsselmen EO-ǵa yqtımal múshelik týraly máseleni talqylamaıtyny habarlanǵan bolatyn.

Eske sala keteıik, Shanhaı yntymaqtastyq uıymyna múshe memleketter Izraıldiń Iran Islam Respýblıkasy aýmaǵyna jasaǵan áskerı soqqylaryn qatań aıyptady.

Aıta ketelik ShYU-ǵa múshe elder mádenı baılanystardy tereńdetýge múddeli ekeni týraly jazǵan edik.