Ereýildiń saldarynan Germanııanyń áýejaılarynda 70 reıs keıinge shegerildi
ASTANA. 25 qańtar. QazAqparat - Germanııada qaýipsizdik qyzmetiniń qyzmetkerleri uıymdastyrǵan ereýil 70 avıareıstiń keıinge shegerilýine sebep boldy, dep habarlady RBK.
Máselen, Reseıge úsh ushaqtyń ushýy jáne sondaı-aq Peterbýrgten Germanııaǵa baǵyttalǵan keshki reıs keıinge shegerildi.
Ekinshi kúnge jalǵasqan ereýildi «Verdı» qyzmeti salasynyń qyzmetkerleri uıymdastyrdy. Olar Vestfalııa áýejaılarynda birneshe myńdaǵan qyzmetkerlerdiń jalaqysyn 30 paıyzǵa deıin kóterýdi talap etýde, dep habarlady Associated Press.
Qazirgi ýaqytta ereýildiń saldarynan Germanııadaǵy eki halyqaralyq áýejaı jumysyn toqtatty.
Kásipodaqshylardyń ókili Andrea Bekkerdiń sózine qaraǵanda, narazylyq bildirý aktsııasyna qaýipsizdik qyzmetiniń 200-ge jýyq qyzmetkeri qatysýda.
