Eren Holding Qazaqstanǵa ınvestıtsııa salý úshin áleýetti jobalardy qarastyrady
QR Premer-Mınıstri Álıhan Smaıylov pen Eren Holding basshysy Ahmet Eren Qazaqstan ekonomıkasynyń túrli salalarynda jańa ınvestıtsııalyq jobalardy iske qosý perspektıvalaryn talqylady, dep habarlaıdy QazAqparat.
Álıhan Smaıylov Úkimet atalǵan holdıngtiń respýblıka aýmaǵyndaǵy jobalarǵa ınvestıtsııa salý nıetin joǵary baǵalaıtynyn atap ótti. Onyń aıtýynsha, búginde elimizde túrik kapıtalynyń qatysýymen 4 myńnan astam kompanııa jumys isteıdi. Atap aıtqanda, taý-ken metallýrgııa kesheni, ınfraqurylym, tamaq ónerkásibi jáne farmatsevtıka sııaqty salalarda jobalar iske qosyldy.
«Eki el arasyndaǵy qalyptasqan ornyqty senim deńgeıi men yntymaqtastyqqa degen ortaq umtylys bizge jańa perspektıvalar ashýǵa múmkindik beredi», — dedi Premer-Mınıstr.
Úkimet basshysy atap ótkendeı, búginde elimizde ınvestorlar úshin barlyq qajetti jaǵdaılar jasalǵan jáne zamanaýı ınstıtýtsıonaldyq orta qalyptasqan. Atap aıtqanda, basym salalardaǵy jobalardy júzege asyrý aıasynda kedendik tólemderden bosatý, túrli salyq jeńildikteri, salyq zańnamasynyń turaqtylyǵyna kepildikter jáne t.b. qarastyrylǵan.
Óz kezeginde Ahmet Eren tıisti ınvestıtsııalyq sheshimder qabyldaý úshin holdıngtiń Qazaqstanda áleýetti jobalardy zerdeleýge daıyn ekenin aıtty.
«Biz óndiristi keńeıtemiz jáne ınvestıtsııalyq jańa múmkindikterdi qarastyryp jatyrmyz. Bul qaǵaz óndirisi, energetıka jáne toqyma ónerkásibi sııaqty salalar bolýy múmkin. Biz taý-ken metallýrgııa keshenine de ınvestıtsııa salýǵa daıynbyz. Bul rette, jumystyń joǵary sapasyna qol jetkizýge múmkindik beretin tehnologııalar bar. Sondyqtan ınvestıtsııa máselelerin birlesip qarastyrǵymyz keledi», — dedi Eren Holding basshysy.
Kezdesý nátıjesinde Qazaqstan aýmaǵynda áleýetti ınvestıtsııalyq jobalar pýlyn pysyqtaý jáne barlyq ózekti máseleler boıynsha belsendi dıalogty qoldaý týraly kelisimge qol jetkizildi.
