Erekshe jaýapkershilikti talap etetin úı janýarlaryn serýendetýge qatysty túzetýler engizildi
NUR-SULTAN. QazAqparat – Májilistiń jalpy otyrysynda palata depýtattary «Janýarlarǵa jaýapkershilikpen qaraý týraly» zań jobasyn ekinshi oqylymda maquldady, dep habarlaıdy QazAqparat tilshisi.
Atalǵan zań jobasyn Parlament Májilisi 2021 jylǵy 27 qazanda birinshi oqylymda maquldady.
Zań jobasynyń negizgi mindetteri janýarlarǵa qaraý kezinde jalpy jáne arnaıy talaptar belgileý, janýarlardy qatygezdikpen qaraýdan, olardy azaptaý men qyrylýdan qorǵaý, janýarlardy qatygezdikpen jansyzdandyrýǵa jol bermeý, qoǵamda adamgershilik pen izgilikti nyǵaıtý, qańǵybas janýarlardyń sanyn retteý salasyndaǵy aqparattyń qaýipsizdigin, ashyqtyǵyn, azamattardyń ózge de quqyqtary men zańdy múddelerin qamtamasyz etý bolyp otyr.
Zań jobasyn ekinshi oqylymǵa daıyndaý barysynda depýtattar:
1) janýarlarǵa qaraý qatygezdikpen qaraý bolyp tabylmaıtyn jaǵdaılardy naqtylaýǵa;
2) jergilikti atqarýshy organdarynyń janýarlarǵa arnalǵan jekeshe panajaılardy qosa qarjylandyrýyna;
3) on alty jasqa tolmaǵan adamdarǵa erekshe jaýapkershilikti talap etetin úı janýarlaryn serýendetýge tyıym salýdy engizýge;
4) qańǵybas janýarlardy bıýdjet qarajaty esebinen, sondaı-aq Qazaqstan Respýblıkasynyń zańnamasynda tyıym salynbaǵan ózge de kózder esebinen vaktsınalaýǵa baǵyttalǵan túzetýlerdi engizdi.
Májilis depýtatty Aleksandr Mılıýtınniń aıtýynsha, depýtattar halyqtyń áleýmettik osal toptaryn qoldaý maqsatynda olar ıeleri bolyp sanalatyn úı janýarlaryn Qazaqstan Respýblıkasynyń zańnamasyna sáıkes bıýdjet qarajaty esebinen esepke alýdy júzege asyrý boıynsha normany engizdi.
Zań jobasyn talqylaý barysynda jyljymaly haıýanattar baqtaryn, kontaktili zooparkterdi, janýarlardyń jyljymaly kórmelerin, delfınarıılerdi, jyljymaly okeanarıýmdardy qurýǵa jáne olardyń qyzmetine tyıym salý týraly zooqorǵaýshylardyń usynystary eskerildi. Osy normanyń atalǵan uıymdardyń menshik ıelerine taratý nemese qaıta uıymdastyrý jónindegi rásimderdi júrgizý úshin ýaqyt berý maqsatynda keıinge qaldyrý merzimi bolady.
Janýarlarǵa izgilikpen qaraý qaǵıdattaryn nyǵaıtý úshin depýtattar janýarlarǵa adamgershilikpen jáne izgilikpen qaraý jóninde halyqty aǵartý jáne tárbıeleý boıynsha jumystardy uıymdastyrýǵa qatysty normalardy engizdi.
Depýtattar ýákiletti organnyń qańǵybas janýarlardy vaktsınalaý jáne sterıldeý qaǵıdalaryn ázirleý jáne bekitý boıynsha quzyretin, jergilikti atqarýshy organdardyń úı janýarlaryn serýendetýge tyıym salynǵan oryndardy aıqyndaý boıynsha, úı janýarlaryn esepke alýdy uıymdastyrý, qańǵybas janýarlardyń sanyn retteý jónindegi is-sharalardy uıymdastyrý boıynsha quzyretin naqtylady.
Sonymen qatar, jalpy otyrysta «Qazaqstan Respýblıkasynyń keıbir zańnamalyq aktilerine janýarlarǵa jaýapkershilikpen qaraý máseleleri boıynsha ózgerister men tolyqtyrýlar engizý týraly», «QR Ákimshilik quqyq buzýshylyq týraly kodeksine janýarlarǵa jaýapkershilikpen qaraý máseleleri boıynsha ózgerister men tolyqtyrýlar engizý týraly» ilespe zań jobalary da ekinshi oqylymda maquldandy.
