Erekshe taýarlardy baqylaýǵa qatysty zań jobasyna ózgeris engizildi
«Qazaqstan Respýblıkasynyń keıbir zańnamalyq aktilerine erekshe taýarlardy baqylaý máseleleri boıynsha ózgerister men tolyqtyrýlar engizý týraly» Qazaqstan Respýblıkasy zańynyń jobasyn QR Parlamentiniń Májilisi 2021 jylǵy 7 sáýirde birinshi oqylymda maquldady. Zań jobasynyń maqsaty – Qazaqstan Respýblıkasy zańnamalyq aktileriniń normalaryn «Erekshe taýarlardy baqylaý týraly» QR zańy jobasynyń erejelerine sáıkes keltirý, quqyqtyq olqylyqtar men kollızııalardy joıý, sondaı-aq ózindik ereksheligi bar taýarlardy baqylaý salasyndaǵy zańnamany jetildirý», - dedi Májilistiń halyqaralyq ister, qorǵanys jáne qaýipsizdik komıtetiniń tóraǵasy Aıgúl Quspan.
Zań jobasy 6 kodekske jáne 10 zańǵa ózgerister men tolyqtyrýlar engizýdi kózdeıdi.
«Jumys tobynyń otyrystarynda depýtattar zań jobasyna jappaı qyryp-joıý qarýyn, qarý-jaraq pen áskerı tehnıkany jasaý kezinde paıdalanylatyn tehnologııalardyń, ǵylymı-tehnıkalyq aqparattyń jáne kórsetiletin qyzmetterdiń ımporty úshin qylmystyq jaýapkershilikti belgileý talqylandy. QR Kásipkerlik kodeksinde belgilengen memlekettik baqylaý men qadaǵalaýdyń jalpy tártibinen memlekettik shekara arqyly erekshe taýarlardyń ótkizilýine baqylaýdy alyp tastaýǵa baǵyttalǵan ózgerister men tolyqtyrýlar engizildi. Baqylaý júrgizý tártibi «Erekshe taýarlardy baqylaý týraly» zań jobasynda bekitilgen», - deıdi ol.
Osylaısha «Erekshe taýarlardy baqylaý týraly» zań jobasyna sáıkes keltirýge baǵyttalǵan ózgerister men tolyqtyrýlar engizildi.
«Budan basqa, depýtattar zań jobasyn zań tehnıkasynyń talaptaryna sáıkes keltirý, sondaı-aq onyń mazmunyn naqtylaý jáne jaqsartý boıynsha túzetýler engizdi. Zań jobasy boıynsha kelip túsken barlyq usynystar jan-jaqty qaralyp, depýtattardyń, memlekettik organdar jáne «Atameken» ulttyq kásipkerler palatasy ókilderiniń qatysýymen ótken jumys tobynyń otyrystarynda talqylandy», - dedi ol.
Depýtattar zań jobasyn maquldady.
