«Erekshe mańyzdy sapar» - respýblıkalyq basylymdarǵa sholý
***
«Egemen Qazaqstan» gazetiniń búgingi sanynda «Erekshe mańyzdy sapar» degen taqyryppen maqala basyldy. Maqalada keshe keshke jaqyn Qazaqstan Respýblıkasynyń Prezıdenti Nursultan Nazarbaev memlekettik saparmen Qytaı Halyq Respýblıkasynyń astanasy Pekın qalasyna kelgeni aıtylady. «Osy kúni Elbasy ózi túsken Qytaıdyń memlekettik «Dıaoıýıpaı» rezıdentsııasynda Hý Tszıntaomen beıresmı kezdesti. Oǵan eki jaqtan birqatar laýazymdy tulǵalar qatysty. Kezdesýden keıin Qytaı Halyq Respýblıkasynyń Tóraǵasy Hý Tszıntao Qazaqstan Respýblıkasynyń Prezıdenti Nursultan Nazarbaevqa keshki qonaqasy berdi. Qytaı jaǵy Elbasynyń bul saparyna erekshe mán berýde. Memlekettik sapardyń resmı bóligi búgin bastalady», -delingen maqalada.
***
«Aıqyn» gazetiniń búgingi sanynda «Úmitkerler iriktelip jatyr» degen taqyryppen maqala basyldy. Onda atap kórsetilgenindeı, Ortalyq saılaý komıssııasy QR Prezıdenti laýazymyna úmitkerlerdiń ótinishin qabyldaýdy toqtatty. Belgilengen merzimge deıin kezekten tys prezıdenttik saılaýǵa úmitker retinde 22 adam ótinish berip úlgergen. «Olardyń 4-eýi dúbirli dodaǵa qoǵamdyq birlestikterdiń atynan tússe, 18-i ózin-ózi usyndy. Ázirshe Nursultan Nazarbaev qana QR prezıdenttigine kandıdat retinde resmı tirkelip tur. Ol belsendi saılaý quqyǵy bar azamattardyń 8 paıyzǵa jýyǵynyń daýysyna ıe bolyp otyr. Al onyń opponentteri - Sálim Óten, Mels Eleýsizov, Musaǵalı Dýambekov jáne Gúldana Toqbaeva óz jaqtastarynyń qoldaryn jınap jatyr»-, delingen maqalada.
Sondaı-aq gazettiń búgingi sanynda Bilim jáne ǵylym mınıstri Baqytjan Jumaǵulovtan alynǵan suhbat shyqty. Taqyryby «Jańa zań bizge jańa baǵyt beredi». Suhbatta jańadan qabyldanǵan «Ǵylym týraly» zańnyń negizgi baǵyttary, ǵylym men bilim salasyndaǵy oryn alatyn ózgerister men ınnovatsııalyq damýǵa bet túzegen jańa sheshimder, ǵalymdardyń mártebesi men bilim salasyn qarjylandyrýdyń basty tetikteri týraly áńgime órbıdi.
***
«Alash aınasy» basylymy «100 sporttyq keshen aýyl balalaryn qýanta ala ma?» degen taqyryppen maqala jarııalady. Onda keshe ótken QR Týrızm jáne sport mınıstrliginiń alqa májilisinde aıtylǵan el sportynyń ótken jylǵy tolaǵaı tabystary baıandalady jáne bolashaqta mınıstrliktiń aýyl sportynyń damýyna arnalǵan «100 sport kesheni» atty baǵdarlamany usynyp otyrǵandyǵy jetkiziledi. «Mınıstr sóz arasynda aýyl sportyn da nazardan qaldyrmady. «Ásirese aýyldyq jerlerdegi balalarǵa erekshe kóńil bólý qajet. Qazirgi kezde «100 mektep, 100 aýrýhana» baǵdarlamasynan keıin 100 sport keshenin salýdy usynyp otyrmyz», - dep atap kórsetti mınıstr T. Dosmuhambetov», - dep jazady basylym.
