Erekshe kútimdi qajet etetin 22 jas kásibı bilim alyp shyqty

Joba Bolashak Charity qorynyń bastamasymen, elorda ákimdigi men Amanat partııasynyń qoldaýymen júzege asyp jatyr.

Sabaqtar Astana qoǵamdyq tamaqtandyrý jáne servıs kolledjinde, sondaı-aq BURO Architecture & Design seriktes uıymynyń keńsesinde ótken. Jobaǵa aýtızm spektrindegi ereksheligi bar, Daýn sındromy bar, psıhıkalyq damýy tejelgen, sondaı-aq sóıleý jáne estý qabiletinde ereksheligi bar 15 pen 28 jas aralyǵyndaǵy jastar qatysty.

Qordyń qamqorshylyq keńesiniń tóraǵasy Dınara Gaplan bul bastama erekshe jastardyń mamandyq meńgerip, qoǵamǵa beıimdelýine kómektesip jatqanyn aıtty.

— «Oqý-óndiristik kombınattar» — erekshe jastardy túrli mamandyqqa baýlıtyn joba. Munda aspazdyq, kondıterlik, tigin isi, dızaın jáne sáýlet baǵyttary oqytylady. Kolledjdermen birge ázirlengen bul baǵdarlama mektep pen tehnıkalyq-kásiptik bilim arasyndaǵy baılanysty kúsheıtti, — dedi ol.

Onyń aıtýynsha, qazir joba aıasynda jastardy oqytýmen qatar, olardy jumysqa beıimdeýge de kóńil bólinip otyr.

— Búginde erekshe jastardyń tek bilim alýy azdyq etedi. Olardyń qoǵamǵa aralasyp, turaqty jumys isteýine jaǵdaı jasaý da mańyzdy. Sondyqtan qazir jastardy jumysqa beıimdeýge kóbirek kóńil bólinip otyr. Bul olardyń jańa ortaǵa úırenip, óz ornyn tabýyna kómektesedi, — dedi Dınara Gaplan.

Jobaǵa qatysýshylardyń biri — 15 jastaǵy Batyrhan Ulyqmanov. Onyń ata-anasy ulyna kóbirek múmkindik jasaý úshin Kókshetaýdan Astanaǵa kóship kelgen.

Batyrhannyń anasy Gúljaına Býranova bul joba balasynyń ómirine jaqsy ózgeris ákelgenin aıtady.

— Joba týraly estigende biz úshin úlken úmit paıda boldy. Oqý barysynda Batyrhan jańa daǵdylardy meńgerip, komandamen jumys isteýdi úırendi. Bastaǵan isin sońyna deıin jetkizýge daǵdylandy. Eń bastysy — dostar tapty. Bul biz úshin úlken jetistik boldy, — dedi ol.

Inklıýzıvti «TATA» kondıterlik tsehynyń negizin qalaýshy Aıgúl Eshmatova joba aıasynda erekshe jastardy jumysqa beıimdeý baǵyty qolǵa alynǵanyn aıtty.

— Biz úshin bul seriktestik tek túlekterdi jumysqa qabyldaýmen shektelmeıdi. Ol erekshe jandarǵa qolaıly jumys ortasyn qalyptastyrýǵa múmkindik beredi. Qazir kóptegen kásipker erekshe qajettiligi bar adamdardy jumysqa alýǵa daıyn. Alaıda olardy ortaǵa qalaı beıimdeý kerek ekenin bile bermeıdi. Sondyqtan qor mamandarynyń qoldaýy óte mańyzdy, — dedi ol.

Onyń aıtýynsha, jańa joba aıasynda bıylǵy jáne aldyńǵy lek túlekteriniń altaýy jumysqa ornalasady.

— Men ulym sııaqty jandar dostar taýyp, ortaǵa aralasyp, ómirden óz ornyn taba alatyn orta qurǵym keledi, — dedi Aıgúl Eshmatova.

Uıymdastyrýshylardyń málimetinshe, joba 2024 jyldan beri Astana, Qaraǵandy, Oral jáne Atyraýda júzege asyrylyp keledi. Osy ýaqytqa deıin 133 jas oqýdan ótken. Onyń ishinde 14 adam taǵylymdamadan ótip, 5-eýi jumysqa ornalasqan. Al 29 qatysýshy kolledjge túsken.

Aıta keteıik, buǵan deıin Qazaqstanda kámelet jasyna tolǵan erekshe jandarǵa arnalǵan memlekettik kúndizgi ortalyqtar ashylýy múmkin ekeni habarlanǵan edi.