Erekshe qorǵalatyn aýmaqqa barǵandar kirý aqysynan bosatylady — Májilis
ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine erekshe qorǵalatyn tabıǵı aýmaqtardy paıdalanǵany úshin tólem alý tártibin jetildirý máseleleri boıynsha ózgerister men tolyqtyrý engizý týraly» zańynyń jobasy birinshi oqylymda maquldandy.
Bul qujat Parlament depýtattarynyń bastamasymen ázirlendi jáne ol jalpy erekshe qorǵalatyn tabıǵı aýmaqtardy paıdalaný salasyndaǵy zańnamany odan ári jetildirýge baǵyttalǵan.
«Respýblıkalyq jáne jergilikti mańyzy bar erekshe qorǵalatyn tabıǵı aýmaqtardy paıdalanǵany úshin tólemaqyny alyp tastaý bóliginde Salyq kodeksine, Bıýdjet kodeksine ózgerister men tolyqtyrýlar engizý usynyldy. Qoldanystaǵy zańnamalarǵa sáıkes, erekshe qorǵalatyn tabıǵı aýmaqtarǵa barǵan kezde azamattar bıýdjetke túsetin erekshe qorǵalatyn tabıǵı aýmaqtardy paıdalanǵany úshin salyq jáne tabıǵat qorǵaý mekemeleri usynatyn qyzmetter úshin alymdardy tóleıdi. Qyzmet úshin alymdar mekemelerdiń arnaıy esep-shotyna túsedi. Qazir erekshe qorǵalatyn tabıǵı aýmaqtarda ornalasqan týrıstik nysandardyń qyzmetkerleri sanalatyn azamattar baqylaý-ótkizý pýnktinen ótken kezde, ár kún saıyn erekshe qorǵalatyn tabıǵı aýmaqtardy paıdalanǵany úshin salyq tóleýge májbúr. Kóp jaǵdaıda bul azamattar jalaqysy tómen maýsymdyq jumystardy atqarady. Bul jaǵdaıǵa azamattardyń tarapynan belgili bir narazylyqtar bar», — dedi Májilis depýtaty Edil Jańbyrshın.
Onyń aıtýynsha, máseleni odan ári shıelenistirmes úshin, sonymen qatar otandyq týrıstik bıznesti odan ári damytýǵa yńǵaıly jaǵdaı jasaý baǵytynda erekshe qorǵalatyn tabıǵı aýmaqtardy paıdalanǵany úshin salyqty alyp tastaý usynyldy.
«Álemdegi osyndaı nysandardaǵy tájirıbeni qarasaq, kóbine týrısterden salyq emes, arnaıy rekreatsııalyq alym alynady. Mysaly, AQSh-ta ulttyq parkterge kirgeni úshin jaıaý adamnan, mototsıklden jáne kólikten tek belgilengen mólsherde alym alynady. Al Reseıdegi „Ýgra“, „Valdaı“ ulttyq parkterinde vızıt-ortalyqtarǵa nemese aqparattyq bólimshelerge kelgen kelýshilerden alym alynbaıdy, tek qonaq úı, ekskýrsııalar men jabdyqtardy jalǵa alý qyzmetteri úshin tólem alynady. Salyq tólemin alyp tastaý erekshe qorǵalatyn tabıǵı aýmaqtarǵa kelýshilerdi kóptep tartýǵa, ekotýrızmniń damýyna jáne azamattarymyzdyń ekologııalyq saýattylyǵynyń artýyna yqpal etedi. Sonymen qatar bul ózgeris tabıǵı aýmaqtarda ǵylymı-zertteýlerdi júrgizýge de múmkindikterdi keńeıtedi, al ol óz kezeginde bıoalýantúrlilik pen ekojúıeni saqtaý úshin mańyzdy. Erekshe qorǵalatyn tabıǵı aýmaqtardy paıdalanǵany úshin salyqty alyp tastaǵanmen, bul aımaqtarda týrısterge kórsetiletin qyzmetter úshin alynatyn tólemderdiń saqtalyp qalatynyn atap ótkim keledi», — dedi depýtat.
