Erekshe qajettiligi bar jandardy alyp júretin adamdar temirjol bıletterin 50% jeńildikpen satyp ala alady

ASTANA. KAZINFORM – Elimizdiń kólik vedomstvosy jolaýshylardy temirjol kóligimen tasymaldaý erejelerine birqatar ózgeris engizýdi usyndy.

Республика күнінде қосымша пойыздар жүреді
Фото: «Жолаушылар тасымалы» АҚ баспасөз қызметі

Jańartylǵan normalar erekshe qajettiligi bar azamattar men olardy alyp júretin tulǵalarǵa arnalǵan jeńildikterdi keńeıtýdi kózdeıdi. Atap aıtqanda, I jáne II toptaǵy múgedektigi bar azamattardy, sondaı-aq erekshe qajettiligi bar balalardy alyp júretin jandardyń jol júrý qunyna 50% jeńildik berý usynylyp otyr (temirjol bıleti).

- Sonymen qatar, endi erekshe qajettiligi bar azamattardan poıyzǵa miný kezinde medıtsınalyq mekemelerden alynatyn anyqtamalar men qujattardy kórsetý talap etilmeıdi. Kólik vedomstvasy bul rásimdi Jolaýshylardy tasymaldaý erejeleriniń 44-tarmaǵynan qujat tapsyrý talabyn alyp tastaý arqyly jeńildetýdi kózdep otyr. Endi qajetti aqparat avtomatty túrde arnaıy derekter bazasy arqyly tekseriledi. Bul sharalar erekshe qajettiligi bar azamattardyń quqyǵyn qorǵaýǵa baǵyttalyp otyr, - dep jazdy Kólik mınıstrliginen.

Atalǵan jańashyldyqtardy mınıstrlikke qarasty Temirjol jáne sý kóligi komıtetiniń mamandary daıyndady. Qazirgi ýaqytta bul ózgerister maquldaý satysynda tur. Erejelerdi 2025 jyldyń ekinshi jartysynda kúshine engizý josparda bar.

Aıta keteıik, qazirgi tańda barlyq toptaǵy múgedektigi bar azamattar úshin áleýmettik mańyzy bar baǵyttarda júretin poıyzdarǵa 50% jeńildik qarastyrylǵan.

Jolaýshylardyń yńǵaıly júrýin qamtamasyz etý maqsatynda otandyq «ZIKSTO» zaýytymen 157 jańa jolaýshylar vagonyn jetkizý týraly kelisim jasaldy. Onyń ishinde 14 vagon múmkindigi shekteýli azamattarǵa beıimdelgen. Bıyl 4 vagon paıdalanýǵa berildi, taǵy 10 vagon jyl sońyna deıin iske qosylady dep josparlanyp otyr.

Sonymen qatar, 2025-2030 jyldar aralyǵynda «Shtadler – Qazaqstan» zaýytymen jasalǵan kelisim aıasynda elimizge taǵy 557 jolaýshylar vagony jetkiziledi. Onyń 35-i erekshe qajettiligi bar jolaýshylarǵa arnalǵan arnaıy kýpelermen jabdyqtalady.

Ýákiletti organ múmkindigi shekteýli azamattarǵa qyzmet kórsetý sapasyn arttyrý baǵytynda júıeli jumys júrgizip keledi. Temirjol quramynan bólek, vokzal ınfraqurylymyn da beıimdeý jumystary qolǵa alynǵan. Bıylǵy temirjol vokzaldaryn aýqymdy jańǵyrtý aıasynda vokzaldar men perrondarǵa pandýstar ornatylady, arnaıy kótergish qurylǵylar engiziledi jáne taktıldi baǵyttaýshy jolaqtar salynady.

Buǵan deıin Senatta múgedektigi bar adamdardyń tótenshe jaǵdaı kezindegi problemalary sóz boldy.

Сейчас читают