Invataksı jańa standarttarmen qyzmet kórsetedi
ASTANA. KAZINFORM — 2025 jyldyń 19 maýsymynda erekshe qajettiligi bar azamattardy avtomobıl kóligimen tasymaldaý qaǵıdalaryna engizilgen ózgeristerge sáıkes, ınvataksı qyzmeti jańa standartqa saı júzege asady. Bul týraly Kólik vıtse-mınıstri azamattardy qabyldaý barysynda málimdedi.
Azamattardy qabyldaý ortalyǵynda Talǵat Lastaev azamattardy jeke qabyldady. Astana, Almaty qalalarynyń, Abaı, Qostanaı jáne Atyraý oblystarynyń turǵyndary kólik salasyna qatysty máselelerdi ortaǵa saldy.
Azamattar negizinen halyqaralyq avtokólik tasymaly, erekshe qajettiligi bar azamattarǵaarnalǵan ınvataksılerdiń qoljetimdiligi men tapshylyǵyn joıý, temirjol vokzaldary men avtomobıl joldaryn jóndeý kezinde polımerli materıaldardy paıdalaný, sondaı-aq Mamyrsý aýylynyń mańynda jol aıryǵyn salý máselelerin qozǵady.
Máselen, vıtse-mınıstr 2025 jyldyń 19 maýsymynda erekshe qajettiligi bar azamattardy avtomobıl kóligimen tasymaldaý qaǵıdalaryna engizilgen ózgeristerge sáıkes, endi erekshe qajettiligi bar azamattarǵa ınvataksı qyzmeti jańa standarttar boıynsha kórsetiletinin atap ótti. Qyzmet kórsetý talaptary keshki jáne túngi ýaqytta, demalys jáne mereke kúnderi erekshe qajettiligi bar balalar men eresekterge qyzmet kórsetý úshin kezekshi ınvataksılerdiń bolýy týraly tarmaqshamen tolyqtyryldy.
Basqa da ótinishterdiń barlyǵyna Talǵat Lastaev jan-jaqty jaýaptar men túsinikteme berdi.
Vıtse-mınıstr halyqpen ashyq dıalogtyń mańyzdylyǵyna toqtalyp, Kólik mınıstrligi qyzmet kórsetý sapasyn arttyryp jáne kólik qyzmetin paıdalanýshylarǵa barynsha qolaıly jaǵdaı jasaý úshin jumysty jalǵastyratynyn atap ótti.
Eske sala keteıik, buǵan deıin Úkimettiń 2025 jylǵy 8 shildedegi qaýlysymen QR Kólik mınıstrligi týraly erejege tolyqtyrýlar engizilgenin jazǵan edik. Mınıstrlikke jańadan qandaı fýnktsııalar engizilgenin myna siltemeden oqı alasyz.