Erekshe bilim berýdi qajet etetin balalardy arnaıy qoldaý standarty ázirlendi
ASTANA. KAZINFORM – Prezıdenttiń tapsyrmasyn iske asyrý jáne ınklıýzıvti, arnaıy bilim berýdi júıeli damytý maqsatynda Oqý-aǵartý mınıstrligi «Erekshe bilim berý qajettilikteri bar balalardy arnaıy psıhologııalyq-pedagogıkalyq qoldaý standartyn bekitý týraly» buıryq jobasyn ázirledi.
Atalǵan vedomstvo baspasóz qyzmetiniń málimetinshe, qujat arnaıy bilim berýdiń sharttaryna, sapasy men mazmunyna qoıylatyn biryńǵaı eń tómengi talaptardy aıqyndaıdy. Sondaı-aq osyndaı qoldaý kórsetýge jaýapty uıymdar men mamandardyń qyzmetin retteıdi. Memlekettik deńgeıde alǵash ret bilim berýdiń barlyq satysynda erekshe bilim berý qajettilikteri bar balalardy súıemeldeýge júıeli tásil bekitiledi.
– Buıryq jobasy balalardyń barlyq sanaty úshin sapaly bilimge teń qoljetimdilikti qamtamasyz etý jolyndaǵy mańyzdy qadam bolmaq. Qazir sondaı-aq «Erekshe bilim berý qajettilikteri bar balalardy keshendi qoldaý týraly» QR Zańy ázirlenip jatyr. Ol balalar men otbasylaryn vedomstvoaralyq súıemeldeýdiń ınstıtýtsıonaldyq jáne quqyqtyq tetikterin qamtıdy, - dep atap ótti ınklıýzıvti jáne arnaıy bilim departamentiniń dırektory Laýra Býtabaeva.
Esterińizge sala keteıik, byltyr mınıstrlik ınklıýzıvti jáne arnaıy bilim berý salasyndaǵy normatıvtik bazaǵa keshendi taldaý júrgizdi. Onyń qorytyndysy boıynsha 15 Normatıvtik-quqyqtyq akt bekitildi. Nátıjesinde, balalarǵa týǵannan bastap mamandyq alǵanǵa deıingi psıhologııalyq-pedagogıkalyq súıemeldeýdiń úsh deńgeıli modeli engizildi. Qoldaý kabınetterine jańa talaptar belgilendi, erekshe bilim berý qajettilikteri bar balalarmen jumys isteýdiń jeke baǵdarlamalary ázirlendi. Pedagog-assıstent, arnaıy pedagog jáne jeke kómekshi sııaqty jańa laýazymdar engizildi.
2024 jyldyń derekteri boıynsha Qazaqstanda erekshe bilim berý qajettilikteri bar balalardyń sany 230 myńnan asty.
Buǵan deıin erekshe qajettiligi bar jandardy alyp júretin adamdar temirjol bıletterin 50% jeńildikpen satyp ala alatynyn habarlaǵan edik.