Erekshe bilim berýdi qajet etetin balalar úshin ınklıýzıvti oqý-ádistemelik quraldar tizbegi bekitiledi
ASTANA. KAZINFORM – Erekshe bilim berýdi qajet etetin balalar úshin arnaıy oqý-ádistemelik quraldar tizbegi ázirlenedi. Bul týraly Astanada ótken «Sheksiz ınklıýzııa» atty І Halyqaralyq ǵylymı-praktıkalyq konferentsııada aıtyldy.
Qazir Qazaqstanda 235 myńnan astam erekshe qoldaýdy qajet etetin bala bar. Olardyń 5 myńǵa jýyǵy erekshe bilim berý ortalyqtaryna barady. Ol úshin elde 500-den astam arnaıy uıym qyzmet etedi. Budan bólek, mektepter men balabaqshalar janynan myńnan astam ınklıýzıvti kabınetter ashylǵan.
– Ol jerde balalar ár túrli korrektsııalyq qyzmetterdi alady. Sonymen qatar balalardy áleýmettendirýge, qoǵamǵa beıimdeýge baǵyttalǵan jumystar atqarylady. Mınıstrlik tarapynan arnaıy bilim berýdi qajet etetin balalarǵa arnalǵan jyl saıyn normatıvti-quqyqtyq jadty jetildirilip otyrady. Oǵan qosymsha bilim berý uıymdaryna jáne ol jerde jumys isteıtin arnaıy pedagogterge ádistemelik nusqaýlyqtar ázirlenip otyrady, – dedi QR Oqý-aǵartý mınıstrligi ınklıýzıvti jáne arnaıy bilim berý departamentiniń dırektory Bulbul Eleýsinova.
Іs-sharaǵa Qazaqstannan bólek Qytaı, Reseı, Mońǵolııa, Ózbekstan jáne Qyrǵyzstan elderinen logopedter, defektologtar, psıhologtar, dárigerler, áleýmettik qyzmetkerler men bilim berý salasynyń jetekshi mamandary keldi. Olar óz tájirıbelerin ortaǵa salyp, sala tóńiregindegi ózekti taqyryptardy talqylady.
– Bárimiz jaqsy túsinemiz: árbir balanyń áleýetin tolyq ashýy úshin bir ǵana muǵalimniń eńbegi jetkiliksiz. Bul úshin birlesken komanda qajet — pedagogtar, logopedter, psıhologtar, dárigerler, áleýmettik qyzmetkerler jáne eń aldymen, ata-analar. Sondyqtan da bizdiń kezdesýimizdiń basty ıdeıasy — pánaralyq pedagogıkalyq yntymaqtastyq. Bul konferentsııa jaı ǵana bilim men tájirıbe almasý alańy emes. Ol — teń múmkindikter qoǵamyn birlese qurýǵa bolatynymyzdyń aıqyn belgisi. Ár bala sapaly bilimge, qoldaýǵa jáne baqytty balalyq shaqqa quqyly, - deıdi joǵarǵy sanatty logoped-pedagog Toıjan Jánıeva.
Basty maqsat – erekshe bilim berý qajettilikteri bar balalardy qoldaý baǵytynda mamandardyń mýltıdıstsıplınarlyq yntymaqtastyǵyn damytý, erte dıagnostıka men túzetý joldaryn talqylaý, ınnovatsııalyq ádistemelerdi engizý jáne ata-analar qaýymdastyǵymen ózara árekettestikti nyǵaıtý.
Aıta keteıik, mundaı Halyqaralyq deńgeıdegi konferentsııa alǵash ret uıymdastyrylyp otyr. Іs-shara eki kúnge jalǵasady.
Elimizde qalyptasqan qaǵıdatqa sáıkes, ınklıýzııa dep múgedektigi bar azamattardy aıtady. Biraq, bul túsinik qate. Mundaı pikirdi BIZDIÑ ORTA podkastynda Májilis depýtaty Tańsáýle Serikov bildirdi.