Erekshe bilim berý salasyna 3 myńnan astam maman jetispeıdi

ASTANA. KAZINFORM — Erekshe bilim berý qajettilikteri bar balalardy oqytýǵa 11 myń pedagog jqmyldyryldy. Bul týraly búgin Quryltaıdaǵy Úkimet saǵatynda Oqý-aǵartý mınıstri Juldyz Súleımenova aıtty.

Almatyda erekshe balalarǵa arnalǵan jeke mektep daýy: qandaı sheshim qabyldandy
Foto: Kazinform/JI

- Erekshe bilim berýdi qajet etetin 237 myń bala esepte tur. Olardy tárbıeleý jáne arnaıy psıhologııalyq-pedagogıkalyq qoldaý kórsetý úshin 541 arnaıy uıym men 11 myń arnaıy pedagog jumys istep jatyr. Qazirgi ýaqytta 3 008 arnaıy maman jetispeıdi. Eń joǵary qajettilik Astana (530), Almaty (305) qalalarynda, Túrkistan (300), Mańǵystaý (219), Almaty (209) oblystarynda baıqaldy. Bul máseleni sheshý úshin 9 kolledjde 500 logoped, 6 kolledjde 200-den astam pedagog-assıstent daıarlanyp keledi, - dedi J.Súleımenova.

Onyń aıtýynsha, Memleket basshysynyń kezekti Qazaqstan halqyna Joldaýynda ınklıýzıvti bilim berý ınfraqurylymyn damytý jóninde sharalar qabyldaý týraly tapsyrmasyn iske asyrý aıasynda úsh jyl ishinde elimizdiń óńirlerinde jańa úlgidegi 20 arnaıy mektep salynbaq.

- Qyrkúıek aıynda múddeli memlekettik organdarmen birlese otyryp, 2026-2030 jyldarǵa arnalǵan Qazaqstan Respýblıkasynda ınklıýzıvti bilim berýdi damytý boıynsha vedomstvoaralyq keshendi jospar qabyldandy. Mınıstrlik ınklıýzıvti bilim berýdiń qoljetimdiligin qamtamasyz etýge erekshe nazar aýdarady. Bul rette negizgi basymdyq ınfraqurylymdy qalyptastyrýdan bilim berý sapasyn arttyrýǵa jáne erekshe bilim berý qajettilikteri bar árbir balaǵa jeke qoldaý kórsetýge baǵyttalǵan, - dedi mınıstr.

Buǵan deıin habarlanǵandaı, mektepterdegi beınebaqylaý júıesine jasandy ıntellektini engizý bastaldy.