Erekshe bilim berý qajettilikteri bar balalarǵa arnalǵan alǵashqy qazaqtildi qosymsha tanystyryldy
AQTÓBE. KAZINFORM – Aqtóbede erekshe bilim berýdi qajet etetin balalarǵa arnalǵan alǵashqy qazaq tilindegi ınnovatsııalyq mobıldik qosymshalar — «Saýatty bala» jáne «Dybystar álemi» ázirlendi. Bul týraly Ǵylym jáne joǵary bilim mınıstrliginiń baspasóz qyzmeti habarlady.
Bul bastama Ǵylym jáne joǵary bilim mınıstrliginiń 2023-2025 jyldarǵa arnalǵan granttyq qarjylandyrýy aıasynda Q.Jubanov atyndaǵy Aqtóbe óńirlik ýnıversıtetiniń ǵalymdary júzege asyrǵan jobanyń nátıjesi.
Joba jetekshisi p.ǵ.k., qaýymdastyrylǵan professor M.Esenǵulova bastaǵan ǵylymı top úı jaǵdaıynda oqıtyn, densaýlyǵyna baılanysty shekteýleri bar nemese áleýmettený múmkindigi tómen balalar úshin qolaıly bilim ortasyn qalyptastyrýdy maqsat etti. Zertteý barysynda balalardyń sóıleý, tanymdyq jáne kommýnıkatıvtik daǵdylaryn damytýǵa arnalǵan qazaq tilindegi zamanaýı kontent ázirleý basty mindetterdiń biri boldy.
Professordyń aıtýynsha, sońǵy jyldary Aqtóbe oblysynda erekshe bilim berý qajettilikteri bar balalar sany aıtarlyqtaı ósip otyr. Osyndaı ósim mamandarǵa túsetin júktemeni arttyryp, qazaq tilindegi qoljetimdi tsıfrlyq resýrstarǵa degen qajettilikti kúrt kúsheıtti.
Sonyń nátıjesinde «Saýatty bala» jáne «Dybystar álemi» mobıldik qosymshalary daıyndalyp, logopedııalyq jattyǵýlar, oıyn-based tapsyrmalar, vızýaldy jáne aýdıomaterıaldar tolyq qamtyldy. Bul quraldar pedagogtar jumysyn jeńildetip qana qoımaı, balalardyń sóıleý daǵdylaryn damytýda tıimdiligi joǵary ekenin tájirıbelik kezeń dáleldedi. «Aqbota» arnaıy balabaqshasy men Sóıleý ortalyǵynyń tárbıelenýshileri qatysqan aprobatsııa barysynda balalardyń sózdik qory, artıkýlıatsııalyq daǵdylary, nusqaýdy túsinýi jáne baılanystyryp sóıleýi aıtarlyqtaı jaqsarǵany anyqtaldy.
Qazaq tilinde qoljetimdi sapaly kontenttiń bolýy ata-analar úshin de úlken kómek bolǵanyn, úı jaǵdaıynda túzetý jáne damytý jumystaryn júıeli júrgize alatynyn atap ótti. Pedagogtar qosymshalardyń ınklıýzıvti bilim berý ortasyn tsıfrlandyrýǵa jańa serpin bergenin aıtady.
Joba nátıjesi — erekshe bilim berý qajettiligi bar balalardyń bilimge qoljetimdiligin keńeıtken, suranysy joǵary, otandyq tsıfrlyq ónim. Bul qosymshalar óńirdegi ǵana emes, elimizdegi ınklıýzıvti bilim berý júıesin damytýǵa mańyzdy úles qosatyn qural retinde baǵalanyp otyr.
Aıta ketelik elimizde sabaq kezinde uıaly telefon ustaýǵa bolmaıdy. Zań kúshine engenimen, áli júzege aspaı keletini týraly jazǵan edik.