Erekshe bilim berýdi qajet etetin balalarǵa tıisti jaǵdaılar jasalady – Nurlan Nyǵmatýlın
NUR-SULTAN. QazAqparat – Maquldanǵan zań jobasy múmkindigi shekteýli balalarǵa basqalarmen birdeı sapaly bilim alýǵa jol ashady. Bul týraly Májilis tóraǵasy Nurlan Nyǵmatýlın málim etti, dep habarlaıdy QazAqparat tilshisi.
«Bilimdi damytý, bilimdi urpaqty tárbıeleý jolynda eshqandaı kedergi bolmaýy kerek. Sebebi, ol bizdiń ultymyzdyń, elimizdiń bolashaǵy. Sondyqtan Memleket basshysy Qasym-Jomart Toqaev jalpy bilim, sonyń ishinde erekshe bilim berý talaptaryn jetildirý máselelerine qatysty arnaıy tasyrma bergen bolatyn», - dep toqtaldy N. Nyǵmatýlın Májilistiń jalpy otyrysynda.
Osy oraıda ol ázirlenip, búgin maquldanǵan zań jobasynda birqatar mańyzdy suraqtar qamtylyp otyrǵanyn aıtty.
«Endi ınklıýzıvti bilim berýge zamanǵa saı standarttar engiziledi. Bul jolda erekshe bilim berýdi qajet etetin balalardyń turǵylyqty jeri eskerilgen. Sonymen birge, atalǵan balalardyń mártebesi zań deńgeıinde tolyqtaı jáne naqty rettelip otyr. Sondyqtan bul zań jobasy múmkindigi shekteýli balalarǵa basqalarmen birdeı sapaly bilim alýǵa, osy salany bilikti mamandarmen qamtamasyz etýge, ınklıýzıvti bilimdi joǵary deńgeıde uıymdastyrýǵa jol ashatyn bolady», - dedi Májilis tóraǵasy.
Budan buryn habarlanǵandaı, búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine ınklıýzıvti bilim berý máseleleri boıynsha ózgerister men tolyqtyrýlar engizý týraly» zań jobasy maquldandy.
