Erekshe balanyń qolyn buraǵan: Almatyda balalar ortalyǵyndaǵy oqıǵa boıynsha is qozǵaldy
ALMATY. KAZINFORM – Áleýmettik jelide jattyqtyrýshynyń kishkentaı balanyń qolyn burap jatqany beınelengen beınejazba jarııalandy.
Jelidegi málimetke sáıkes, oqıǵa Almatydaǵy «Fenıks» balalar túzetý ortalyǵynda bolǵan.
– Almaty qalasy Áıteke bı kóshesinde ornalasqan «Fenıks» ortalyǵynda dıagnozy bar balalardy júıeli túrde uryp-soǵady. Balalardyń basynan taıaqpen, judyryqpen uryp, qorlyq kórsetedi – munyń bárin ata-analar óz kózderimen kórdi. Beınejazbalardy polıtsııa alyp ketti. Biz, erekshe balalardyń ata-analary, ortalyq jumysyn ary qaraı da jalǵastyra ma dep qorqamyz. «Fenıks» ortalyǵynyń dırektory óz qyzmetkerlerin qorǵashtap otyr, - dep jazdy beınejazbany jarııalaǵan ata-analardyń biri.
Beınejazbaǵa baılanysty QR Bala quqyqtary jónindegi ýákil Dınara Zakıeva pikir bildirdi. Ol qazirgi ýaqytta sotqa deıingi tergep-tekserý bastalyp, beınematerıaldar alynǵanyn atap ótti. Almaty qalasynyń polıtsııa departamenti de qazirgi ýaqytta bolǵan oqıǵanyń barlyq mán-jaıyn tolyq jáne obektıvti anyqtaýǵa baǵyttalǵan sharalar júrgizilip jatqanyn málimdedi.
– Tergeý aıasynda beınebaqylaý kameralarynyń jazbalary alyndy. Qatysýshylar men kýágerlerden jaýap alynady, sondaı-aq qajetti is-júrgizý áreketteri taǵaıyndalady, - dep habarlady departamentten.
Eske salaıyq, buǵan deıin Aqtóbede balany uryp-soǵyp, bazarda jumys isteýge májbúrlegen ógeı áke sottaldy.