Erekshe balalarǵa qoldaý kúsheıdi: Elordada 98 arnaıy kabınet jumys isteıdi
ASTANA. KAZINFORM — Astanada erekshe bilim berý qajettilikteri bar balalarǵa arnalǵan qoldaý kabınetteriniń sany 98-ge jetti, dep habarlaıdy elorda ákimdiginiń resmı saıty.
Astanada erekshe bilim berý qajettilikteri bar balalardyń sapaly bilim alýyna jáne mektep ómirine tolyqqandy aralasýyna jaǵdaı jasaý baǵytyndaǵy jumys júıeli túrde júrip jatyr.
— Búginde elorda mektepterinde 5 myńnan astam bala ınklıýzıvti bilim berýmen qamtylǵan. Oqýshylarǵa oqý protsesinde qajetti psıhologııalyq-pedagogıkalyq qoldaý kórsetý úshin mektepterde ınklıýzııany qoldaý kabınetteri jumys isteıdi. Qala mektepterinde qazirgi tańda 98 ınklıýzııany qoldaý kabıneti ashylǵan. Munda erekshe bilim berý qajettilikteri bar balalarǵa psıholog, logoped, defektolog jáne basqa da mamandar tarapynan qoldaý kórsetiledi. Ár balaǵa onyń jeke qajettilikterin eskere otyryp, tıisti jaǵdaı jasaýǵa basymdyq beriledi, — deıdi mamandar.
Inklıýzııany qoldaý kabınetteriniń tıimdiligin elordanyń birqatar mektebindegi tájirıbeden kórýge bolady. Bul kabınetterde balalarǵa arnalǵan jeke jáne toptyq sabaqtar, logoped pen psıholog jumysy, emdik dene shynyqtyrý jáne áleýmettik-turmystyq daǵdylardy qalyptastyrýǵa baǵyttalǵan jumystar uıymdastyrylǵan.
Sonymen qatar ınklıýzıvti bilim berý ortasyn odan ári damytý jumysy jalǵasyp jatyr. Bıyl qosymsha 20 ınklıýzııany qoldaý kabınetin ashý josparlanyp otyr. Bul erekshe bilim berý qajettilikteri bar balalardyń bilim alýyna qolaıly jaǵdaıdy odan ári keńeıtýge múmkindik beredi.
— Inklıýzıvti bilim berý balanyń tek mektepte bilim alýymen shektelmeıdi. Onyń mańyzdy baǵyttarynyń biri — oqýshyny bolashaqqa daıyndaý, qabileti men qyzyǵýshylyǵyna sáıkes mamandyq tańdaýǵa baǵyttaý. Osy maqsatta Astananyń 6 mektebinde úsh jyldan beri erekshe bilim berý qajettilikteri bar balalardy kásibı baǵdarlaýǵa baǵyttalǵan biregeı joba júzege asyrylyp keledi. Joba aıasynda 76 bala jas erekshelikterine saı alǵashqy suranysqa ıe mamandyqtardy meńgerip jatyr. Oqýshylar teorııalyq bilimmen qatar, praktıkalyq daǵdylardy ıgerip, eńbekke beıimdelý múmkindigin alady. Al mektep qabyrǵasynda qalyptasqan daǵdylaryn bolashaqta kolledjderde odan ári damytýǵa múmkindik bar, — delingen habarlamada.
Osylaısha, elorda mektepterindegi ınklıýzıvti bilim berý júıesi erekshe balalardyń bilim alýyna jaǵdaı jasaýmen qatar, olardyń áleýmettik ortaǵa beıimdelýine, óz qabiletin damytýyna jáne bolashaq mamandyǵyn tańdaýǵa baǵyttalǵan.
Buǵan deıin elimizde 30,5 myńnan asa nysan ınklıýzıvti talaptarǵa saı jabdyqtalǵany anyqtaldy.
