Erekshe balalarǵa arnalǵan jańa mektepter 20 óńirde salynady
ASTANA. KAZINFORM — Qazaqstannyń 20 óńirinde erekshe bilim berý qajettilikteri bar balalarǵa arnalǵan jańa formattaǵy mektepter salynady. Budan bólek, óńirlerde ońaltý jáne saýyqtyrý kabınetteri bar uıymdar ashý josparlanyp otyr. Bul týraly Úkimet otyrysynda Oqý-aǵartý mınıstri Juldyz Súleımenova málimdedi.
Joba Memleket basshysynyń Joldaýda bergen tapsyrmalaryn oryndaý aıasynda júzege asyrylady. Jańa mektepter myń orynǵa eseptelgen. Qazir elimizde erekshe bilim berý qajettilikteri bar 237 myńnan astam bala bar. Olarǵa arnalǵan 541 arnaıy uıym jumys isteıdi. Balalardy qoldaý júıesin jetildirý úshin arnaıy mekemelerdiń sanyn kóbeıtip qana qoımaı, osy salada mamandar daıarlaý da qolǵa alynǵan.
— Erekshe bilim berý qajettilikteri bar balalarmen jumys isteıtin mamandar elimizdiń 17 pedagogıkalyq joǵary oqý ornynda jáne 9 kolledjinde daıarlanady. Balalarǵa qoldaý kórsetýde pedagog-assıstentterdiń róli zor. Bilim berý uıymdarynda 7,5 myń pedagog-assıstent jumys isteıdi. Sonymen qatar, bıyl 6 kolledjde pedagog-assıstentterdi daıarlaý bastaldy, — dedi Juldyz Súleımenova.
Mamandardyń pikirinshe, arnaıy uıymdar jelisin keńeıtý balalar men olardyń ata-analaryna kórsetiletin kómektiń qoljetimdiligin arttyrýǵa múmkindik beredi. Almaty qalasynyń psıhology Raýan Saǵadıeva erekshe bilim berý qajettilikteri bar balalarǵa qoldaýdy erterek uıymdastyrý mańyzdy ekenin aıtady.
— Bul — óte ózekti másele. Qazir erekshe bilim berý qajettilikteri bar balalardyń sany jyl saıyn 26 paıyzǵa deıin ósip jatyr. Sondyqtan osyndaı memlekettik mekemelerdi kóbeıtý qajet. Ata-analar kómek izdep, bir mekemeden ekinshisine sabylmaýy kerek. Qajetti qoldaý der kezinde kórsetilýge tıis, — dedi psıholog.
Aıta keteıik, erekshe bilim berý qajettilikteri bar balalardy keshendi qoldaý úshin 2026–2030 jyldarǵa arnalǵan ınklıýzıvti bilim berýdi damytýdyń vedomstvoaralyq keshendi jospary bekitilgen. Qujat balalarǵa kórsetiletin kómekti jetildirýge jáne óńirlerde bilim berý qyzmetteriniń qoljetimdiligin arttyrýǵa baǵyttalǵan.
Buǵan deıin Qazaqstanda BAÁ ınvestorlarynyń qatysýymen quny 1 mlrd dollar bolatyn 20 ınklıýzıvti mektep salý jospary týraly jazǵan edik.
