Erekshe balalardyń ata-analaryn qorlaǵan bloger 78 640 teńge aıyppul tólep, qutyldy
ASTANA. KAZINFORM — Astanalyq bloger áleýmettik jelidegi paraqshasynda beınematerıal jarııalap, onda qoǵamǵa jáne múmkindigi shekteýli adamdardy qorlap, beıádep sózder aıtqan. Búgin Astana polıtsııasy atyshýly blogerdi ustap, ákimshilik is qozǵaǵan edi.
2025 jylǵy 2 jeltoqsanda Astana qalasynyń ákimshilik quqyq buzýshylyqtar jónindegi mamandandyrylǵan sotyna áleýmettik jelide beıádep sózder aıtqan azamatsha O.-ǵa qatysty is tústi. Ol Ákimshilik quqyq buzýshylyq týraly kodekstiń 434-baby 1-bóligi — usaq buzaqylyq boıynsha jaýapqa tartyldy.
Іs materıaldaryna sáıkes, O. Instagram paraqshasynda vıdeo jarııalap, onda qoǵamǵa, onyń ishinde múmkindigi shekteýli adamdarǵa qatysty qorlaıtyn, beıádep sózder aıtqan. Bul áreket qoǵamdyq tártipti buzý retinde baǵalanǵan. Bul is qylmystyq tergeýge jatpaıdy, tek ákimshilik quqyq buzýshylyq retinde qaralady.
Sot otyrysynda O. beıádep sóz qoldanǵanyn moıyndady, biraq «balalardy qorlaý nıetim bolǵan joq» dep túsindirdi.
434-bap boıynsha mynadaı jaza qarastyrylǵan:
-
20 AEK aıyppul;
-
nemese 20–60 saǵat qoǵamdyq jumys;
-
nemese 5–15 táýlikke qamaý.
Alaıda zań boıynsha 14 jasqa deıingi balasy bar áıelderge qamaý qoldanylmaıdy.
— O.-nyń 2016 jyly týǵan balasy bar ekeni rastaldy. Sot onyń balasy bar ekenin jeńildetetin mán-jaı dep tanyp, jaýaptylyqty aýyrlatatyn jaǵdaılar anyqtalǵan joq. Sot sheshimimen O.-ǵa 20 AEK, ıaǵnı 78 640 teńge aıyppul salyndy. Sot qaýlysy ázirge zańdy kúshine engen joq, — delingen habarlamada.
Eske sala ketsek, daýly beınejazba áleýmettik jelide jarııalandy. Áıel óz beınejazbasynda erekshe balalardyń dúnıege kelýin «azǵyndyq» jáne ata-anasyna jiberilgen «jaza» dep aıtqan. Bul erekshe bala ósirip otyrǵan ata-analardyń narazylyǵyn týdyrdy.
Budan buryn áıelge usaq buzaqylyq faktisi boıynsha ákimshilik is qozǵalyp, materıaldar sotqa joldanatyny aıtylǵan edi.