Erekshe balalar qoǵamnan shet qalmaýy kerek — dızaıner

Podıýmǵa kásibı ári jas modeldermen qatar erekshe qajettiligi bar balalar da shyqty. Bul — jobanyń basty ereksheligi.

Uıymdastyrýshylardyń aıtýynsha, mundaǵy maqsat — barlyq balany teń qabyldap, olardyń qoǵamǵa beıimdelýine jaǵdaı jasaý.

Joba avtory ári dızaıner Gúlnur Bóken balalardy qandaı da bir ereksheligine qaraı bólýge bolmaıtynyn aıtty.

— Erekshe balalar qoǵamnan shet qalmaýy kerek. Olar ózderin ózgelermen teń sezinip, birdeı múmkindikke ıe ekenin uǵynýy qajet, — dedi ol.

Sán kórsetilimine qatysqan 200 modeldiń ishinde 20-ǵa jýyq paıyzy erekshe balalar. Olardyń basym bóligi podıýmǵa alǵash ret shyǵyp tur. Mundaı tájirıbe balalardyń ózine degen senimin arttyryp, shyǵarmashylyq áleýetin damytýǵa múmkindik beredi.

Jobaǵa qatysýshylardyń ata-analary da onyń áleýmettik mańyzyna erekshe toqtaldy. Araılym Jataevanyń qyzy bul sharaǵa úshinshi ret qatysty. Aıtýynsha, mundaı orta balalardyń jan-jaqty damýyna oń áser etedi.

— Gúlnur hanym balalardy eshqashan bólip-jarmaıdy. Munda bárine birdeı múmkindik beriledi. Balalar ózderin erkin sezinip, jańa dostar taýyp, jaqsy áser alady, — dedi ata-ana.

VII maýsym aıasynda tórt avtorlyq toptama kópshilik nazaryna usynyldy. Jalpy sany 60 erekshe obraz ázirlengen. Kórsetilimniń negizgi toptamasy — otbasynyń basty qundylyǵy sanalatyn «Alfa Bala» kollektsııasy. Sonymen qatar kórermenderge «Mahabbattyń qyzǵylt hanshaıymy», «Qara hanshaıym» jáne «Manımeıker» toptamalary tanystyryldy.

Balalar arnaıy irikteýden ótken. Kastıng qańtar aıynda bastalyp, elimizdiń jeti qalasynda uıymdastyrylǵan.

— Qatysýshylar eki aı kóleminde kásibı daıyndyqtan ótti. Qorytyndy synaqtan súrinbeı ótken úzdikter búgin podıýmǵa shyqty, — dedi Gúlnur Bóken.

Aıta keteıik, UNIQUE FASHION SHOW — ALPHA BALA jobasy Kreatıvti ındýstrııalardy damytý qorynyń qoldaýymen uıymdastyrylyp otyr.

Eske salaıyq, Qyrǵyzstanda alǵash ret ushaq bortynda sán kórsetilimi ótkenin jazǵanbyz.