Erekshe áserlendik – Belgııalyqtar Koroli Qazaqstanǵa sapary týraly
ASTANA. KAZINFORM – Belgııalyqtar Korol Fılıpp pen Patshaıym Matılda Aqordadan Astananyń ajaryn tamashalady. Korol Fılıpp qonaqjaılyq tanytqany úshin Memleket basshysyna alǵys aıtyp, buǵan deıin Taq murageri retinde Qazaqstanǵa jasaǵan saparlaryn eske aldy.
– Sizdiń basshylyǵyńyzben elińiz damýdyń dańǵyl jolyna túskenine erekshe áserlendik. Sapar kezinde tanysý josparlanǵan jasandy ıntellekt, energetıka, atom energııasy salalary eki el úshin óte mańyzdy. Ǵalymdardyń dóńgelek ústeldegi pikirtalasyna kýá bolamyz. Bizben birge ýnıversıtetterdiń rektorlarynan, kompanııa ókilderinen turatyn úlken delegatsııa keldi, – dedi Korol Fılıpp.
Sondaı-aq kelissóz barysynda eki eldiń resmı delegatsııa músheleri sóz sóıledi.
Taraptar kezdesý sońynda kóptegen bastama kóterilgenine kóńil tolatynyn atap ótip, is júzindegi yntymaqtastyqty odan ári órbitýge daıyn ekenin rastady.
Aıta keteıik, 11-14 qazan kúnderi Belgııalyqtar Koroli Fılıpp jáne Patshaıym Matıldanyń Qazaqstanǵa memlekettik sapary ótedi.
Sapar baǵdarlamasy tórt negizgi baǵytty qamtıdy. Olar – asa mańyzdy paıdaly qazbalar, jasandy ıntellekt, densaýlyq saqtaý, sondaı-aq tarıh pen mádenıet.
Búgin Qasym-Jomart Toqaev Belgııalyqtar Koroli Fılıpp pen Matılda patshaıymdy Aqordada qarsy aldy.
Prezıdent Qasym-Jomart Toqaev Qazaqstan Belgııany Eýropadaǵy ýaqyt tezinen ótken senimdi seriktesi dep qarastyratynyn atap ótti.
