Erdos Ahmadıev: Sochıde tý alyp shyqqanda qatty qobaljyǵanmyn, bul joly ózgeshe sezimde boldym
SAPPORO. QazAqparat - Búgin Japonııanyń Sapporo qalasynda ótip jatqan VІІІ qysqy Azııa oıyndarynda qazaqstandyq shańǵyshy, Azıada oıyndarynda Qazaqstan týyn kóterip shyqqan Erdos Ahmadıev 10 shaqyrymdyq klassıkalyq jarysta baǵyn synady. Alaıda júldege qol jetkize almady. Biz jarystan keıin Ahmadıevpen arnaıy jolyǵyp, shaǵyn suhbat alǵan edik.
- Azıada oıyndary bastalǵaly birneshe kún ótti. Bizdi qashan júlde alyp qýantasyz?
- Ol kúnder de alys emes dep oılaımyn. Men almasam da qasymdaǵy birge júrgen áriptesim Rınat Mýhın qazaq qorjynyna alǵashqy altyndy alyp berdi. Negizi biz bir-birimizge jarys barysynda qatty kómektesemiz. Ásirese, komandalyq jarysta birimiz ekinshimizdi alǵa shyǵarýǵa qolaıly múmkindikterdi qarastyramyz. Short-trekte aldyńda bir káris ne japon sportshysy kele jatsa, ol ádeıi jyǵylyp, seniń jolyńdy bógeıdi de, artyndaǵy komandalastaryn aldyǵa shyǵarýǵa jol jasaıdy. Biz olaı qasaqana jyǵylmasaq ta, janymyzdaǵy áriptesterimizdi aldyǵa ozdyrýǵa kómektesetin kezderimiz bolady.
- Alda áli 30 shaqyrymdyq jarystar bar. Múmkin medal úshin kúresetin bolarsyz?
- Árıne, komandalyq jarysta altyn alamyz degen oıdamyz. Sebebi, jekeleı syndarda eki myqty japondyq bar. Olar bizge jol berer emes. Estefetalyq jarysta bizdiń komandamyz myqty shyǵatynyna senimdimin. Biraq, bizdiń ár kúnimiz josparly túrde bekitilip qoıǵan. Biz 26 kúni ushaqqa otyrýymyz kerek. Jospar solaı. Eger jarys kestesi men ushý ýaqytymyz sáıkes kelmese, jarysqa qatyspaımyz. Jabylý saltanatynan buryn ketemiz.
- Sapporodan kete salyp basqa jarystarǵa attanatyn boldyńyzdar ǵoı...
- Iá, barlyǵyn bapkerlerimiz aldyn ala josparlap, sheship qoıǵan. Biz shákirt bolǵasyn bapkerlerimiz ne deıdi, sony oryndaýymyz kerek.
- Sochı Olımpıadasynda alǵash ret Qazaqstan týyn alyp shyqtyń. Mine, Sapporoda da Týymyzdy saǵan senip tapsyrdy. Qandaı sezimde boldyń?
- Árıne, elińniń baıraǵyn ustap, top bastap shyǵý - úlken baqyt. Shynymdy aıtsam, Sochıde Tý alyp shyǵasyń degende tań qalǵam. Qatty qobaljyǵanym da ras. Ol jańalyq men úshin kútpegen jaıt bolǵan. Tipti, alǵashynda bapkerim «Týdy sen ustap shyǵýyń múmkin» dedi. Sol kezde úmitkerlerdiń qataryna qosylǵanymnyń ózine qatty qýanyp edim. Al bul joly ózgeshe sezimde boldym. Osyndaı múmkindik berip, maǵan senim bildirgenderi úshin Elbasyna, otandyq sport basshylaryna alǵysym sheksiz. Endi, Sapporoda el qorjynyna bir medal syılasam bolǵany.
Áńgimeńizge rahmet! Jeńisti kúnder kóp bolsyn...
foto:Іzturǵan Aldaýev
