Erdoǵannyń basty qarsylasyn tutqyndaýǵa order berildi
ASTANA. KAZINFORM – Ystanbul meri jáne Túrkııa prezıdenti Rejep Taıyp Erdoǵannyń basty saıası qarsylasy Ekrem Imamoglýdy qamaýǵa alý týraly order shyqty. Bul týraly Sabah basylymy habarlady.
Basylymnyń málimetinshe, jemqorlyqqa qarsy operatsııa aıasynda Imamoglý men onyń baspasóz hatshysy Murat Ongýndy jáne taǵy 100-ge jýyq adamdy qamaýǵa alý týraly sheshim qabyldanǵan. Qala meriniń úıinde de tintý bastaldy.
— Operatsııa aıasynda Ystanbul meri Ekrem Imamoglý men onyń baspasóz keńesshisi Murat Ongýndy qamaýǵa alý týraly order berildi. Sondaı-aq jýrnalıster men kásipkerler de bar 100-ge jýyq adam tergeýde. Operatsııanyń Medya A.Ş kompanııasyndaǵy memlekettik satyp alýlarǵa jáne Kúrdistan Jumys partııasy arasynda jasalǵan «qalalyq kelisimge» qatysty ekeni aıtyldy. Imamoglynyń Saryerdegi úıiniń tóńireginde izdestirý sharasy júrgizildi, - delingen habarlamada.
18 naýryzda Ystambul ýnıversıteti Imamoglynyń dıplomyn qaıtaryp alǵanyn habarlady. Dıplom berýdegi qatelikke baılanysty qabyldanǵan bul sheshim Imamoglýdy Túrkııa zańy boıynsha prezıdenttik saılaýǵa túsý quqyǵynan aıyrady. Oǵan sebep retinde Imamoglýdyń 1990 jyly Soltústik Kıpr ýnıversıtetinen Stambýl ýnıversıtetine zańsyz aýystyrylǵany kórsetilgen.
Túrkııa zańy boıynsha prezıdenttik saılaýǵa túsý úshin joǵary bilim qajet, sondyqtan bul sheshim Imamoglýdy saılaýǵa qatysý quqyǵynan aıyrady. Onymen birge taǵy 27 adamnyń dıplomy da jaramsyz dep tanyldy.
Túrkııanyń negizgi oppozıtsııalyq partııasy Respýblıkalyq halyq partııasy bul sheshimge parlament deńgeıinde narazylyq bildirdi. Buǵan jaýap retinde Ystanbul ýnıversıteti Túrkııanyń joǵary bilim berý keńesi (YÖK) Imamoglýdyń dıplomyn jalǵan dep taýyp, sol sebepti kúshin joıǵanyn habarlady. Bul máselege qatysty barlyq qujat qosymsha tergeý úshin Ystanbul prokýratýrasy men YÖK-ke beriledi.
Aıta keteıik, Erdoǵan qaıtadan prezıdent saılaýyna túsýi múmkin ekenin bildirgen bolatyn.