Erdoǵan jáne basqa da birqatar eldiń basshylary Qazaqstandy Respýblıka kúnimen quttyqtady

 Memleket basshysynyń atyna Respýblıka kúnine oraı quttyqtaýlar kelip jatyr, dep habarlaıdy Kazinform Aqordaǵa silteme jasap. 

Prezıdent Qasym-Jomart Toqaevtyń atyna Respýblıka kúnine oraı shet memleketter men halyqaralyq uıymdar basshylarynan quttyqtaý jedelhattary áli de kelip túsip jatyr.

Túrkııa Prezıdenti Rejep Taııp Erdoǵan Qasym-Jomart Toqaev pen baýyrlas Qazaqstan halqyn Ulttyq merekemen quttyqtap, elimizge baq-bereke tiledi.

«Til, tarıh jáne mádenıet sııaqty ortaq qundylyqtarymyzǵa negizdelgen qarym-qatynasymyz strategııalyq seriktestik rýhynda qarqyndy damyp keledi. Eki eldiń yntymaqtastyǵy jańa salalarmen tolyǵa túskeni qýantady. Bizdiń birlesken kúsh-jigerimizdiń nátıjesinde Túrkııa men Qazaqstan arasyndaǵy baılanystar odan ári nyǵaıa beretinine senimdimin. Sizben Astana qalasynda ótetin Túrki memleketteri uıymynyń H sammıtinde kezdesetinime qýanyshtymyn», – delingen jedelhatta.

Slovakııa Prezıdenti Zýzana Chapýtova Memleket basshysyna turaqty, ádiletti jáne baqýatty Qazaqstandy damytýǵa baǵyttalǵan reformalardy iske asyrýda tabys tiledi.

Sondaı-aq ol halyqaralyq quqyq qaǵıdattaryn qurmetteýge negizdelgen ózara yntymaqtastyqtyń nátıjesinde elderimiz qazirgi zamannyń syn-qaterlerin birge eńseretinine senim bildirdi.

Serbııa Prezıdenti Aleksandr Výchıch óziniń jedelhatynda eki el arasyndaǵy ózara qurmet pen túsinistikke quralǵan dástúrli dostyq qatynastardyń nyǵaıyp kele jatqanyn atap ótti.

Aleksandr Výchıch Serbııa jáne Qazaqstannyń múddesi men ıgiligi jolyndaǵy ózara yqpaldastyq aldaǵy ýaqytta da keńeıedi dep senetinin jazǵan.

Sonymen qatar óz quttyqtaýlaryn Lıtva Prezıdenti Gıtanas Naýseda, TMD Parlamentaralyq Assambleıasy Keńesiniń Bas hatshysy Dmıtrıı Kobıtskıı, AÓSShK Bas hatshysy Qaırat Sarybaı, UQShU Bas hatshysy Imanǵalı Tasmaǵambetov jáne basqalar joldady.

Quttyqtaý jedelhattary áli de kelip túsip jatyr.