Erdoǵan jańa konstıtýtsııa qabyldaýǵa shaqyrdy

ASTANA.KAZINFORM — Túrkııada eldiń jańa konstıtýtsııasyn qabyldaý máselesi qaıtadan kóterilip jatyr. Bul týraly bir kún buryn túrik jastarymen kezdesýinde Túrkııa prezıdenti Rejep Taıyp Erdoǵan málim etti, dep habarlaıdy Kazinform tilshisi.

Túrkııa basshysy 20 jyl buryn qabyldanǵan qoldanystaǵy negizgi zańnyń eskirgenin jáne qazirgi zamanǵa saı kelmeıtinin atap ótip, eldiń jańa konstıtýtsııasyn ázirleý qajettigin aıtty.

— Túrkııa demokratııalyq, azamattyq jáne jańartylǵan konstıtýtsııaǵa laıyq. Biz bul protsesti budan bylaı keıinge qaldyra almaımyz, — dedi Erdoǵan 19 mamyrda jastarmen jáne jas sportshylarmen kezdesýinde.

Ol joba boıynsha jumystardyń bastalyp ketkenin habarlady. Onyń aıtýynsha, negizgi zańdy qalyptastyrýǵa óskeleń urpaqtyń qatysýyna erekshe kóńil bólinetin bolady. Erdoǵan bul jastar jańa qundylyqtardyń basty tasymaldaýshysy jáne Túrkııanyń turaqty bolashaǵynyń kepili bolatynyna senimdi.

Bul Túrkııada jańa konstıtýtsııany qabyldaý týraly úndeýlerdiń birinshi ret shyǵýy emes. Alaıda bul joly prezıdent bıliktiń bul protsesti kúsheıtip, naqty nátıjelerge qol jetkizýge nıetti ekenin ashyq aıtty.

Prezıdenttiń jaqtastary jańa konstıtýtsııa eldegi ózgeristerge saı, demokratııalyq standarttar men memlekettiń qazirgi negizgi zańyndaǵy «áskerı tóńkeris kezeńiniń» izin joıý úshin qajet dep sanaıdy.

Sonymen qatar, keı sarapshylar Túrkııa prezıdentiniń jańa konstıtýtsııany qabyldaý jónindegi qazirgi bastamasy eldiń negizgi zańyn jańartý nıetimen ǵana emes, saıası eseptermen de baılanysty bolýy múmkin dep esepteıdi. Atap aıtqanda, olar qazirgi konstıtýtsııada prezıdent merziminiń sanyn ekige deıin shekteıtinin jáne Túrkııa 2018 jyly prezıdenttik basqarý formasyna ótkennen beri Erdoǵan bul qyzmetti ekinshi ret atqaryp otyrǵanyn atap ótti.

Qoldanystaǵy erejelerge sáıkes, parlament merziminen buryn saılaýdy taǵaıyndamaıynsha, onyń qaıta saılaýǵa túsýine ruqsat etilmeıdi. Bul turǵyda jańa konstıtýtsııany talqylaý basqa elderdegi pretsedentterge uqsas termınderdi «nólden shyǵarý» úshin quqyqtyq negiz jasap, Erdoǵanǵa resmı túrde saılaýǵa qatysýǵa múmkindik bere alady.

Al, Túrkııanyń Ádilet jáne damý partııasy 2027 jyldyń kúzinde kezekten tys prezıdenttik saılaý ótkizý múmkindigin joqqa shyǵarmaıdy.

Buǵan deıin Túrkııa prezıdenti Rejep Taıyp Erdoǵan aldaǵy prezıdenttik saılaýǵa qatysýy múmkin ekenin meńzegen.