Erdoǵan Ystambuldaǵy lańkestikke baılanysty Qazaqstanǵa saparyn keıinge qaldyrdy - BAQ
ASTANA. QazAqparat - Túrkııa prezıdenti Redjep Erdoǵan Ystambuldaǵy lańkestik saldarynan Qazaqstanǵa saparyn keıinge qaldyrdy. Bul týraly «Anadolý agenttigi» habarlady.
Agenttiktiń aqparatyna sáıkes, Túrkııa prezıdenti 11-12 jeltoqsanda Memleket basshysy Nursultan Nazarbaevtyń shaqyrtýymen Qazaqstanǵa kelmekshi bolǵan.
Eske salsaq, Ystambulda "Beshıktash" - "Býrsaspor" oıynynan keıin eki jarylys oryn aldy. Bılik derekterine súıensek, aldymen "Vodafon-arena" stadıony mańynda jarylǵysh zat qoıylǵan kólik jaryldy, 45 sekýndtan keıin saıabaqta lańkes jankeshti ózin jaryp jiberdi.
Sońǵy derekterge sáıkes shabýyl saldarynan 29 adam - 27 polıtseı, eki qarapaıym adam qaıtys boldy. 166 adam jaraqat aldy. Lańkestikke baılanysty toǵyz adam ustaldy.
11 jeltoqsanda Túrkııada aza tutý kúni jarııalandy. Lańkestik jaǵdaıǵa baılanysty Qazaqstan Prezıdenti N. Nazarbaev TR Prezıdenti Redjep Taıyp Erdoǵanǵa kóńil aıtý jedelhatyn joldady.
