Erdoǵan Túrkııanyń alǵashqy pılotsyz elektrobýsyn synap kórdi

ANKARA. Anadolu-QazAqparat - Túrkııa prezıdenti Rejep Taıyp Erdoǵan dúısenbide alǵashqy otandyq pılotsyz elektr avtobýsyn synaqtan ótkizdi, dep habarlaıdy QazAqparat Anadolu agenttigine silteme jasap.

Karsan kompanııasynyń pılotsyz elektrobýsy el prezıdentiniń ákimshiligi kesheniniń aýmaǵynda tanystyryldy.

Qozǵalys barysynda múldem derlik dybysy bolmaıtyn avtobýstyń uzyndyǵy 8 metr.

Túrkııa basshysy jyl sońyna deıin uzyndyǵy 24 metrlik pılotsyz elektr avtobýsyn qurastyrý josparlanyp otyrǵanyn aıtty.

«Túrkııa elektrobýstar naryǵynda laıyqty oryn alatynyna senimdimin. Jaqynda avtobýstardyń serııalyq óndirisi jolǵa qoıylady», - dedi Erdoǵan.

Sondaı-aq otandyq pılotsyz elektr avtobýstaryn jappaı óndirýdiń arqasynda Túrkııa álemdik avtomobıl naryǵynyń osy segmentinde óz ornyn tabatynyn, al otandyq kompanııalar jahandyq brendterdiń qataryna qosylady degen úmitin bildirdi.