Erdoǵan Túrkııadaǵy saılaý nátıjesi boıynsha málimdeme jasady

ANKARA. QazAqparat - Túrkııa álemge demokratııa sabaǵyn úıretti, dep málim etti Rejep Taıyp Erdoǵan prezıdent jáne parlament saılaýynyń nátıjesine túsinikteme bere otyryp. Bul týraly «Anadoly» agenttigi habarlady.

Joǵarǵy saılaý komıssııasynyń basshysy Sadı Gıýven Rejep Taıyp Erdoǵan prezıdent saılaýynda absolıýtti kópshilik daýysyn jınaǵanyn jarııa etti. 

Erdoǵannyń aıtýynsha, saılaý kúngi qaýipsizdik pen erkindiktiń kórinisi - túrik demokratııasy jetistiginiń kórsetkishi.

«Saılaýǵa kelýshiler sany 90 paıyzǵa jetip, álemniń kóptegen elderine úlgi kórsettik. Eń bastysy Túrkııanyń barlyq jerinde saılaýdy uıymdastyrýdyń joǵary deńgeıde bolǵanyna kóńilimiz tolady», - dedi túrik kóshbasshysy.

Prezıdent 24 maýsymdaǵy saılaý Túrkııasynyń budan ary qaraıǵy jetistikteriniń kepili bolady degen úmit bildirdi.

Erdoǵan otandastaryn ult bolashaǵy úshin birigýge shaqyrdy. «Saılaý aldy kezeńdegi bolǵan barlyq ókpe-renishti, kelispeýshilik pen urys-keristi artta qaldyrý kerek. Elimizdiń bolashaǵy úshin kúsh-jigerimizdi ortaqtastyrar kez keldi», - dedi memleket basshysy.

Prezıdent saılaý úderisi men daýys berý nátıjelerin synaýdan bas tartýǵa úndedi. «Eshkim óziniń sátsizdikterin jasyrý úshin saılaý úderisine kóleńke túsirmeýi tıis», - dedi Erdoǵan.

Prezıdent Túrkııa bıligi eldi damytýdyń 2023 jylǵa deıingi tujyrymdamasynda kórsetilgen maqsattarǵa jetýge tolyqtaı ázir ekendigin atap ótti.

Túrkııada qala kóshelerinde Rejep Taıyp Erdoǵannyń jáne ol jetekshilik etetin Ádilet jáne damý partııasynyń jeńisin merekeleýdi bastady.