Erdoǵan: Túrkııa Reseı men Ýkraına arasyndaǵy kelissózderdi uıymdastyrýǵa daıyn

ASTANA. KAZINFORM — Túrkııa prezıdenti Rejep Taıyp Erdoǵan Reseı basshysy Vladımır Pýtınmen telefon arqyly sóılesti, dep habarlaıdy Anadoly.

Bul týraly Túrkııa Prezıdenti ákimshiligi janyndaǵy Kommýnıkatsııalar basqarmasy habarlady.

Kezdesý barysynda túrik-reseı qarym-qatynasynyń jaı-kúıi, sondaı-aq aımaqtyq jáne halyqaralyq máseleler talqylandy.

Túrkııa basshysy Reseı prezıdentiniń Ystambulda Reseı men Ýkraına arasyndaǵy kelissózderdi qaıta bastaý bastamasyn quptady.

Erdoǵan Ankaranyń Reseı men Ýkraına arasyndaǵy qaqtyǵysty turaqty sheshýge baǵyttalǵan kelissózderdi uıymdastyrýǵa daıyn ekenin bildirdi.

Prezıdent Erdoǵan beıbitshilikke qol jetkizý úshin múmkindikter terezesi ashylǵanyn atap ótti. Onyń aıtýynsha, jan-jaqty bitimgerlik beıbit kelissózderge qajetti jaǵdaı jasaıdy.

Kreml baspasóz qyzmetiniń málimetinshe, áńgime barysynda Reseı prezıdentiniń 15 mamyrdan bastap Ystambulda tikeleı Reseı-Ýkraına kelissózderin qaıta bastaý jónindegi bastamasy egjeı-tegjeıli talqylanǵan.

— Rejep Taıyp Erdoǵan bul bastamany tolyq qoldap, Stambuldy kelissóz alańy retinde usynýǵa daıyn ekenin jetkizdi. Túrik tarapy turaqty beıbitshilikke qol jetkizýge baǵyttalǵan kelissózderdi uıymdastyrý men ótkizýge barynsha qoldaý kórsetetin bolady, — delingen habarlamada.

Sonymen qatar, Reseı prezıdenti Máskeýde ótken Ekinshi dúnıejúzilik soǵystaǵy Jeńistiń 80 jyldyǵyna arnalǵan saltanatty sharalar men osy kúnderi ótken joǵary deńgeıdegi halyqaralyq kezdesýler týraly óz áserimen bólisti.

Memleket basshylary saýda-ekonomıkalyq jáne ınvestıtsııalyq yntymaqtastyqty, sonyń ishinde energetıka salasyndaǵy strategııalyq birlesken jobalardy damytýǵa ózara múddelilik bildirdi.