Erdoǵan Túrkııa premerin referendýmdaǵy jeńisimen quttyqtady
ASTANA. QazAqparat - Túrkııa prezıdenti Taııp Erdoǵan premer-mınıstr Bınalı Iyldyrymdy jáne eldiń basty zańyna ózgeris engizýdi qoldaýshy partııa ókilderin referendýmdaǵy jeńisterimen telefon arqyly quttyqtady, dep habarlaıdy TASS.
Bul týraly Túrkııa kóshbasshysynyń ákimshiligindegi derekkóz habarlady. «Prezıdent referendýmdaǵy jeńisimen Ádilet jáne damý partııasynyń tóraǵasyn, premer-mınıstr Bınalı Iyldyrymdy, Ulttyq qozǵalys partııasynyń basshysy Devlet Bahchelı men Uly birlik partııasynyń tóraǵasy Mýstafa Destıdjıdi quttyqtady. Ol daýys berý qorytyndylaryna baılanysty túrik halqyna baqyt tiledi»,-dedi ákimshilik ókili.
Atalǵan úsh partııa saılaý naýqany kezinde birige otyryp, túzetýlerdi nasıhattady. Osy ýaqytta bıýlletenderdiń 98 paıyzy óńdeldi. Aldyn ala málimetter boıynsha, daýys berýshilerdiń 51,3 protsenti Túrkııada prezıdenttik bılikti engizý jónindegi túzetýlerdi qoldady.
