Erdoǵan Túrkııa oppozıtsııasynyń jetekshisin sotqa berdi

ASTANA. KAZINFORM — Túrkııa Prezıdenti Rejep Taıyp Erdoǵan oppozıtsııalyq Halyqtyq-respýblıkalyq partııanyń (HRP) jetekshisi Ózgúr Ózeldi qorlady dep aıyptap, ony sotqa berdi. Ol moraldyq ótemaqy retinde 500 myń lıra (shamamen 12,5 myń AQSh dollary) talap etip otyr, dep TASS.

Bul týraly Túrkııa basshysynyń advokaty Hıýseın Aıdyn habarlady.

— 5 shilde kúni Halyqtyq-respýblıkalyq partııa (HRP) tóraǵasy Ózgúr Ózel tarapynan Prezıdentimizge baǵyttalǵan negizsiz aıyptaýlarǵa, qorlaý sıpatyndaǵy málimdemeler men qoqan-loqqylarǵa baılanysty Ankaranyń birinshi ınstantsııadaǵy azamattyq sotyna 500 myń lıra kóleminde moraldyq shyǵyndy óteý týraly talap aryz berildi. Sonymen qatar, Ózeldiń Prezıdentti qorlaý jáne oǵan qoqan-loqqy kórsetý áreketteri boıynsha Túrkııa Qylmystyq kodeksiniń 310/2-babyna sáıkes Ankaranyń bas prokýratýrasyna qylmystyq shaǵym joldandy, — dep jazdy advokat áleýmettik jelidegi X paraqshasynda.

5 shilde kúni HRP atqarý komıtetiniń otyrysynan keıingi baspasóz konferentsııasynda Ózel sol kúni Antalıa, Adana, Adyıaman jáne Manavgat qalalarynyń ákimderi sybaılas jemqorlyq isteri boıynsha tutqyndalýyna baılanysty Erdoǵandy avtorıtarızmge aıyptady. Ol sonymen birge qarasha aıynda kezekten tys prezıdenttik saılaý ótkizýdi talap etip, bılik sol saılaýda jeńilis tabatynyn málimdedi.

Erdoǵan buǵan deıin de Ózgúr Ózelge qarsy qorlaý úshin birneshe ret sotqa júgingen. Máselen, 6 sáýirde ótken partııanyń kezekten tys sezinde Ózel Túrkııa prezıdentin «hýntanyń basshysy» dep ataǵannan keıin Erdoǵan taǵy da 500 myń lıra kóleminde moraldyq ótemaqy talap etip, sotqa aryzdanǵan bolatyn.

Aıta keteıik, 2 shilde kúni Ystanbuldaǵy Sarachhane alańynda qala eks-ákimi Ekrem Imamoǵlýǵa qoldaý kórsetý maqsatynda aýqymdy mıtıng ótti.

Buǵan deıin Túrkııanyń Uly ulttyq májilisinde Prezıdent Rejep Taıyp Erdoǵannyń áskerı saladaǵy ókilettikterin keńeıtý týraly zań jobasy qaralyp jatqany habarlanǵan edi.

Aıta ketelik Túrkııada úsh qalanyń meri ustalǵan edi.