Erdoǵan syıǵa tartqan kitaptyń ıdeıa avtory Qazaqstanda marapatqa ıe boldy

Qazaqstan Prezıdenti Qasym-Jomart Toqaevqa syıǵa tartylǵan «Táýelsizdiktiń 35 jyldyǵy. Túrkııa-Qazaqstan qatynastary» atty kitapty qurastyrǵan ári ıdeıa avtory Túrkııanyń Ádilettilik jáne damý partııasy (AK Parti) tóraǵasynyń orynbasary — Túrki memleketterimen baılanys basqarmasynyń tóraǵasy Kúrshad Zorlý ІІ dárejeli «Dostyq» ordenimen marapattaldy.

Eske salaıyq, atalǵan kitapty Túrkııa Prezıdenti Rejep Taııp Erdoǵan 14-15 mamyr aralyǵynda Qazaqstanǵa jasaǵan memlekettik sapary barysynda alǵashqy bolyp QR Memleket basshysy Qasym-Jomart Toqaevqa tabystaǵan bolatyn. 10 akademık pen avtordyń ǵylymı-taldamalyq materıaldary toptastyrylǵan jáne qazaq, túrik tilderinde jaryq kórgen jınaq-kitap qazir tsıfrlyq platformalarda qoljetimdi.

Aıta keteıik, kitaptyń alǵy sózin Túrkııa Respýblıkasynyń Prezıdenti Rejep Taııp Erdoǵan ózi jazdy.

— Túrkııa men Qazaqstan arasyndaǵy qatynastar aldaǵy kezeńde odan ári nyǵaıyp, tereńdeı túsetinine senimimiz mol. Osyndaı eńbekter ózara túsinistikti kúsheıtip, yntymaqtastyq múmkindikterin keńeıtip, ortaq tarıh pen bolashaqqa degen kózqarasty nyǵaıtatyn mańyzdy mindet atqaratyny sózsiz. Eki el arasyndaǵy baılanystar Túrki memleketteri uıymy aıasyndaǵy kópjaqty yntymaqtastyq tetikteri arqyly ekijaqty ólshemnen asyp tústi. Qadirli baýyrym Qazaqstan Prezıdenti Qasym-Jomart Toqaevtyń parasatty ári kóregen kóshbasshylyǵynyń arqasynda bul qatynastar ózara kúsh-jigerimizdiń nátıjesinde jańa serpinge ıe boldy, — dep atap ótti Erdoǵan kirispe sózde.

Búgin Aqordada Qazaqstan Respýblıkasynyń Prezıdenti Qasym-Jomart Toqaev Kúrshad Zorlýdy ІІ dárejeli «Dostyq» medalimen marapattady. Kúrshad Zorlý Qazaqstan men Túrkııa arasyndaǵy baýyrlastyq baılanys aldaǵy ýaqytta da nyǵaıa beretinine senim bildirdi.

— Asa qurmetti Prezıdent myrza, osy mańyzdy kúnde mundaı joǵary marapatqa meni laıyq kórgenińiz úshin alǵys bildiremin. Sonymen qatar, Prezıdentimiz R.Erdoǵannyń ystyq sálemin jetkizgim keledi. Ótken apta Prezıdentimizdiń Qazaqstanǵa joǵary deńgeıdegi sapary ótti. Bul saparda «Qoja Ahmet ıAsaýı» atyndaǵy ordendi dúnıejúzinde tuńǵysh bolyp bizdiń elimizdiń basshysyna tabystadyńyz. Bul úshin sizge úlken alǵys bildiremiz. Qazaqstan men Túrkııanyń baýyrlastyǵy nyǵaıa bersin. Qazaqstan eli jasaı bersin, — dedi Túrkııanyń Ádilettilik jáne damý partııasy (AK Parti) tóraǵasynyń orynbasary.

Buǵan deıin Kúrshad Zorlý Qazaqstan men Túrkııa arasyndaǵy qarym-qatynas eki el men túrki dúnıesiniń ǵana emes, búkil Eýrazııanyń bolashaǵyn aıqyndaıtyn zor áleýetke ıe ekenin aıtty.

Eske salsaq, 13 mamyrda Rejep Taııp Erdoǵan Qazaqstanǵa memlekettik saparmen keldi.

Qasym-Jomart Toqaev elimizge memlekettik saparmen kelgen Túrkııa Prezıdenti Rejep Taııp Erdoǵandy qarsy aldy.

Qazaqstan men Túrkııa arasynda máńgilik dostyq týraly kelisimge qol qoıyldy.

Sonymen qatar, Toqaev pen Erdoǵan Qazaqstan-Túrkııa bıznes forýmyna qatysty.