Erdoǵan ishki máselelerdi saıasılandyrý áreketi úshin oppozıtsııany synǵa aldy

ASTANA. KAZINFORM —  Túrkııa prezıdenti Rejep Taıyp Erdoǵan Stambul meriniń jaqynda ustalýyna alǵash ret pikir bildirdi, dep habarlaıdy Kazinform agenttiginiń menshikti tilshisi.

Ердоған ішкі мәселелерді саясиландыру әрекеті үшін оппозицияны сынға алды
Фото: trthaber.com

Málimdemesinde Erdoǵan oppozıtsııany, ásirese Respýblıkalyq halyqtyq partııany (RHP), ishki qaqtyǵystaryn jáne zańǵa qatysty máselelerin saıasılandyrýǵa umtyldy dep aıyptady. Ol oppozıtsııanyń mundaı oqıǵalardy ulttyq deńgeıdegi problemaǵa aınaldyrýdy ádetke aınaldyrǵanyn atap ótti, alaıda bul máseleler tek belgili bir shaǵyn topqa ǵana qatysty. Erdoǵan bul áreketterdi ekijúzdilik dep atap, olardyń qoǵamnyń nazaryn memlekettiń naqty máselelerinen basqa jaqqa burýǵa baǵyttalǵanyn aıtty.

– Eger baıqaǵan bolsańyz, oppozıtsııa, onyń ishinde RHP, sot organdary qoıǵan aıyptaýlarǵa eshqashan naqty jaýap bere almaıdy. Bul dıplomdarǵa, jemqorlyqqa nemese urlyqqa qatysty bolsyn, olar árdaıym qarapaıym joldy tańdaıdy – saıası urandarmen shektelip, halyqty aldaýǵa tyrysady, – dedi Erdoǵan.

Túrkııa prezıdenti sondaı-aq oppozıtsııanyń quqyq qorǵaý organdary men sot júıesine qysym jasap, olardy ózderiniń ishki máselelerin sheshý úshin paıdalanýǵa tyrysatynyn atap ótti. Erdoǵannyń pikirinshe, mundaı áreketter eldiń bedeline nuqsan keltirip qana qoımaı, eldegi qazirgi jaǵdaı týraly jalǵan túsinik qalyptastyrady.

– Biz jalǵan aqparattyń, jala jabýdyń jáne shyndyqty joqqa shyǵarýdyń qıratýshy kúshin aqıqattyń ústemdigimen, ádildikke, zańǵa jáne ar-ojdanǵa baǵynýmen jeńemiz, – dedi ol.

Erdoǵannyń aıtýynsha, saıası alańdaǵy ishki qaqtyǵystar ulttyq máselelermen teńestirilmeýi kerek. Onyń pikirinshe, oppozıtsııa aıyptaýlarǵa saıası manıpýlıatsııalarmen emes, konstrýktıvti túrde jaýap berýdi úırenýi tıis.

Aıta ketelik  Ystambulda 100-den astam adam, onyń ishinde qala basshysy Ekrem Imamoglý tutqynǵa alynǵan edi.

Сейчас читают