Erdoǵan: ShYU — Azııa elderimen dıalog ornatýǵa óte yńǵaıly platformanyń biri
ASTANA. KAZINFORM — Túrkııa terrorızmge qarsy kúreste ShYU-men dıalogty damytýǵa múddeli. Bul týraly elordadaǵy Táýelsizdik saraıynda Shanhaı yntymaqtastyq uıymy sammıti aıasynda ótip jatqan «ShYU+» kezdesýinde Túrkııa Prezıdenti Rejep Taııp Erdoǵan aıtty.
«Búginde álemdik qaýipsizdik arhıtektýrasynyń búkil irgetasy shatqaıaqtap tur. Islamdy dushpan kórý, azyq-túlik qaýipsizdigi, kólik tasymaly barysynda kedergiler qazirgi álemdegi geosaıası kúızelisti odan saıyn ýshyqtyryp otyr. Munyń ishindegi eń soraqy qatigezdik Gaza sektorynda bolyp jatyr. Izraıldiń Gaza sektoryna qatigezdikpen shabýyl jasaýy 40 myńǵa jýyq jazyqsyz jannyń opat bolýyna ákeldi. Qıraǵan ǵımarattardyń astynda myńdaǵan balanyń múrdesi qaldy. Izraıldiń osy áreketine tosqaýyl qoıýymyz qajet. Halyqaralyq quqyq aıasynda olardyń mundaı qatigezdigin májbúrli túrde toqtatatyndaı áreketterge barýymyz qajet. Sonda ǵana álemdik deńgeıde ádilet ornaıdy», — dedi Túrkııa Prezıdenti.
Sonymen qatar Rejep Taııp Erdoǵan Túrkııa terrorızmge qarsy kúreste ShYU-men dıalogty damytýǵa múddeli ekenin basa aıtty. Onyń atap ótýinshe, osyndaı terrorızm aktileriniń saldarynan mıllıondaǵan adam bosqynǵa aınaldy. Tek Túrkııanyń ózinde 4 mln bosqyn bar.
«Atajurtymyz — Ortalyq Azııa elderimen ár salada ortaq paıda negizindegi yntymaqtastyqty damytýǵa daıynbyz ári múddelimiz. ShYU Azııa elderimen dıalog ornatýǵa óte yńǵaıly platformalardyń biri ekenin atap ótkim keledi», — dedi mártebeli meıman.
