Erdoǵan ólim jazasyn qaıtarýdy «dereý» qolǵa almaq

ASTANA. QazAqparat - Túrkııa prezıdenti Rejep Taıyp Erdoǵan basqarý formasyn ózgertýge qatysty referendým aıaqtalǵannan keıin, ólim jazasyn qaıtarý týraly taǵy bir plebıstsıt ótýi múmkindigin málimdedi, dep jazdy Lenta.rý.

Ystanbulda ózine qoshemet bildirgen halyq aldynda sóz sóılegen Erdoǵan premer-mınıstr Bınalı Iyldyrymmen jáne ultshyl oppozıtsııa kóshbasshysymen ólim jazasyn qaıtarý máselesin «dereý» talqylaıtynyn málim etti.

Atap ótilgendeı, mundaı qadam Túrkııanyń Eýropalyq odaqqa ený týraly kelissózderiniń oń nátıjesiz qalatynyn bildirer edi.

Jeksenbi, 16 sáýir kúni ótken referendýmda Túrkııa konstıtýtsııasynyń 18 babyna ózgerister engizý qajet pe degen másele qaraldy. Halyq ózgeristerdi quptaǵan jaǵdaıda premer-mınıstrdiń qyzmeti qysqaryp,  prezıdent vıtse-prezıdentter men mınıstrlerdi, joǵary laýazymdy sheneýnikterdi óz erkimen taǵaıyndaı alady.

Odan bólek, prezıdent tótenshe jaǵdaı jarııalaý jáne parlamenttiń basym daýsymen ǵana kúshi joıylatyn jarlyqtardy shyǵarý quqyǵyna ıe bolady.

Resmı derekterge sáıkes, bıýlletenderdiń 98 paıyzyn óńdeý qorytyndysy boıynsha, daýys berýshilerdiń 51,3 paıyzy ózgeristerdi engizýdi quptaǵan, al 48,59 paıyzy qarsy daýys bergen.