Erdoǵan «arandatýshylyqty toqtatýǵa» shaqyrdy

ASTANA. KAZINFORM – Túrkııada sońǵy jyldardaǵy eń iri úkimetke qarsy sherýler alty kún boıy jalǵasyp jatyr, dep habarlaıdy Euronews.

Túrkııa qalalarynda myńdaǵan adam kóshege shyǵyp, sherýge qatysyp jatyr. Olar Ystanbul meri Ekrem Imamoglynyń bosatylýyn jáne merziminen buryn prezıdent saılaýyn ótkizýdi talap etip, Ystanbul qalalyq ákimshiliginiń aldyna jınaldy.

Túrkııa prezıdenti Rejep Taıyp Erdoǵan «arandatýshylyqty toqtatýǵa» shaqyrdy.

Rejep Taıyp Erdoǵan dúısenbi kúngi úkimet otyrysynan keıin teledıdar arqyly sóılegen sózinde oppozıtsııalyq Respýblıkalyq halyq partııasyn qoǵamdyq tártipti buzdy dep aıyptap, sherýlerdi «zorlyq-zombylyq qozǵalysy» dep atady.

– Men bul shaqyrýdy birneshe ret jasadym, búgin de qaıtalap aıtamyn: arandatýshylyqpen azamattarymyzdyń tynyshtyǵyn buzýdy toqtatyńyz, – dedi Erdoǵan.

Ol sondaı-aq Respýblıkalyq halyq partııasynyń tóraǵasy Ozel Ozgýrdy tártipsizdikter úshin sot aldynda jaýap beretinin aıtyp qorqytty.

– Árıne, bul áreketter úshin parlamentte saıası jaýapkershilik jáne sotta zańdy jaýapkershilik bolady, – dedi Rejep Taıyp Erdoǵan.

Aıta keteıik, 19 naýryz kúni Ystanbul meri jáne Túrkııa prezıdenti Rejep Taıyp Erdoǵannyń basty saıası qarsylasy Ekrem Imamoglýdy qamaýǵa alý týraly order shyqqan bolatyn.

Sodan keıin Ystanbul meri Ekrem Imamoglý arnaıy operatsııa kezinde ustaldy.

Ystanbul, Ankara, Izmır jáne Rıze qalalarynda jappaı narazylyq sherýleri ótti.

Erdoǵan ishki máselelerdi saıasılandyrý áreketi úshin oppozıtsııany synǵa aldy.

Sybaılas jemqorlyq boıynsha aıyptalǵan Ystanbul meri qamaýǵa alynyp, qyzmetinen ýaqytsha shettetildi.

Túrkııadaǵy zańsyz narazylyqtar kezinde 123 polıtsııa qyzmetkeri jaralanyp, 1 133 adam ustaldy.

Ankarada 1 sáýirge deıin jappaı mıtıngi ótkizýge tyıym salyndy.