Erdoǵan men ash-Sharaa Sırııany qalpyna keltirý máselelerin talqylady

ASTANA. KAZINFORM – Túrkııa prezıdenti Rejep Taııp Erdoǵan men Sırııanyń ýaqytsha prezıdenti Ahmed ash-Sharaa Ankarada kezdesý ótkizdi, dep habarlaıdy Euronews.

Sırııanyń ýaqytsha basshysy Ahmed ash-Sharaa men Túrkııa prezıdenti Rejep Taııp Erdoǵan Sırııa ekonomıkasy men qarýly kúshterin qalpyna keltirý, sondaı-aq qaýipsizdik máselelerin talqylady.

Kezdesýden keıin ótken birlesken baspasóz máslıhatynda Erdoǵan «Túrkııanyń Sırııaǵa qatysty saıasatynyń negizi árqashan onyń aýmaqtyq tutastyǵy men birligin saqtaý bolǵanyn» málimdedi. 
Túrkııa basshysy Sırııanyń qıraǵan qalalaryn qalpyna keltirýge kómektesýge ýáde berip, ekonomıkalyq damý qarqyn alǵan saıyn bosqyndardyń óz erkimen oralý kórsetkishi de arta túsetinin atap ótti.

- Arab jáne ıslam áleminiń bul protseste jańa ákimshilik pen Sırııa halqyna qajetti materıaldyq jáne moraldyq qoldaý kórsetýi mańyzdy, - dedi Erdoǵan. 

Ash-Sharaa Túrkııaǵa kórsetken kómegi úshin alǵys aıtyp, Erdoǵandy aldaǵy ýaqytta Sırııaǵa saparmen kelýge shaqyrdy. 

13 jylǵa sozylǵan azamattyq soǵys kezinde Bashar Asadqa qarsy toptardy belsendi túrde qoldaǵan Ankara Sırııanyń jańa ákimshiliginiń negizgi odaqtastastarynyń biri sanalady.
Bul Sırııanyń jańa basshysynyń shetelge ekinshi sapary. Eki kún buryn ol Er-Rııadqa baryp, onda Saýd Arabııasynyń murager hanzadasy Muhammed bın Salmanmen kezdesti.

Buǵan deıin Túrkııanyń eki áskerı bazasy Sırııada ornalastyrylatyny týraly jazǵan bolatynbyz. 

Sondaı-aq Túrkııa men Sırııa eki el arasyndaǵy ekonomıkalyq baılanysty qalpyna keltirýge baǵyttalǵan mańyzdy qadamdardy qamtıtyn saýda qatynastarynyń jol kartasyn júzege asyrýǵa kiriskenin habarladyq.